La Xunta entregó los Andrés Solar

La Xunta pola Defensa de la Llingua
Asturiana fizo esti sábadu la entrega de los tradicionales premios "Andrés Solar" que llegaron con esta a la XVIII edición. El premiu positivu, que va pa quien más trabayare en favor de la llingua asturiana foi pa los llagareros asturianos qu'etiquuten n'asturianu, y en nome d'ellos xubió a recoyer el premiu'l responsable de Sidra Choro, un llagar de Meres - Siero fundáu en 1941 y qu'anguaño lleva Salvador Carbajal, la segunda xeneración de la familia nel negociu. Xunta'l llagar de Siero, tamién había otru pegoyu acutáu pa Sifra Alonso de Nava, anque naide nun pudo acudir en representación d'esti otru llagar, l'únicu xunta Choro qu'etiqueta n'asturianu.

El premiu negativu, en reconocencia al llabor destructivu pa contra l'idioma, foi pa Ovidio Sánchez, presidente del Partíu Popular n'Asturies y que nun xubió a recoyer el premiu, como ye vezu. L'actu, qu'enllenó la capacidá del salón d'actos del Antiguu Institutu de Xixón, contó con un entamu musical y cola proyección del curtiu "Aida" como complementos, amás de dase llecturaal tradicional discursu, qu'esti añu dexó de llau el balance del añu y centrose namás n'esplicar la dimensión de los dos premios. D'otra manera, esti añu en que van cumplise los venti del fallecimientu de la persona d'Andrés Solar, la Xunta quixo sorrayar la so presencia proyectando a lo llargo del actu unes tresparencies con testos manuscritos del poeta.