La Xunta entrega los Andrés Solar

La Xunta pola Defensa de la Llingua Asturiana celebra a les 19:30 de la tarde nel Salón d'Actos del Antiguu Institutu Xovellanos de Xixón la entrega de los XVIII Premios Andrés Solar Estos premios, que recuerden la figura del escritor y miembru fundador de la Xunta Andrés Solar Santurio, pretenden premiar y castigar a les persones y/o instituciones qu'a lo llargo l'añu destaquen pola so llabor positiva o negativa pa cola llingua asturiana.

Nel llau positivu, nesti añu 2003 la Xunta decidió premiar a los pocos llagareros qu'etiqueten n'asturianu, Sidra Choro en Meres, Siero, y Sidra Alonso en Nava, dos llagares pequeños que son los únicos de los más de 60 qu'esisten nel país que ponen les etiquetes n'asturianu, un auténticu agraviu comparativu. El premiu tien un evidente sentíu d'oportunidá nun momentu en que, acabante echar a andar el Conseyu Regulador de la Denominación d'Orixe de la Sidra Asturiana, esta entidá namás emplega'l castellanu y amás failo d'una manera enforma agresiva desaniciando de la so imaxe tanto l'idioma como'l pallabreru asturianu que va enxertu cola cultura sidrera y sustituyéndolu dafechu por espresiones castellanes, les más d'elles tresplantaes del mundu del vinu.

Per otra parte, el premiu negativu o "madreñazu" que s'entrega a quien rescamplare pol so llabor negativu pa cola llingua asturiana va pa la persona d'Ovidio Sanchez Díaz, Presidente del Partíu Popular d'Asturies. L'acta del xuráu diz qu'Ovidio Sánchez ganó'l premiu por ser "líder del despropósitu y de les declaraciones extemporanies " en referencia a les sos declaraciones en que negaba que ficiere falta normalizar l'asturianu y apostaba pa la enseñanza asturiana por un modelu billingüe castellanu-inglés.