La Xunta electoral nun da de pasu candidatures n'asturianu

La Xunta Electoral, que se pronunciaba esti sábadu pa dar les llistes definitives con vistes a les elecciones del 25 de mayu, decidió nun dar de pasu tres de les 33 candidatures municipales que presentaba l'agrupación nacionalista Andecha Astur. En concreto trátase de les llistes polos conceyos de Morcín, Mieres y Riosa. Los dos primeros dependen de la Xunta electoral de zona de Mieres, mientres que'l terceru pertenez a la Xunta electoral de zona de L.lena.

El partíu que presenta les llistes diz que la refuga a estes tres llistes espeya les contradiciones del sistema xurídicu y políticu español, nel que delles xuntes electorales "consienten" la presentación de candidatures n'asturianu mientres otres tiren pela via represiva. Andecha Astur, que tien un llargu historial de candidatures refugaes por tar n'asturianu, consiguió nes anteriores elecciones del añu 99 que'l Tribunal Constitucional reconociere, nuna sentencia histórica, el derechu a poder presentar candidatures escrites en llingua asturiana, un derechu qu'acaba d'estrapayar ensin xustificación nenguna esta decisión de la Xunta Electoral, que'l partíu políticu anuncia que va recurrir per tolos medios llegales afayadizos.