La XDLA reclama al Gobiernu y a los grupos parllamentarios que trabayen pa cambiar la dirección de RTPA

|
XDLA

La Xunta pola Defensa de la Llingua Asturiana (XDLA) vuelve denunciar que la RTPA sigue ensin cumplir el compromisu marcáu nel Estatutu d'Autonomía, la Llei d'Usu del Asturianu y la mesma llei de creación de RTPA, qu'establecen que los medios públicos tienen que ser una parte activa nel procesu de recuperación del patrimoniu llingüísticu del país.

Nel so comunicáu apunten la falta de conteníos infantiles, d'entretenimientu y de doblaxes al asturianu, indicando que nun existen dende l'añu 2017, en TPA.  Denunciando tamién que la RPA tuvo más de mes ensin emitir el boletín informativu n'asturianu que dende hai años existía de llunes a vienres a les 12.00 hores. L'espaciu tenía una duración de namás 10 minutos, pero dende'l 7 de mayu hasta'l 14 de xunu nun s'emitió. Nel escritu recuenden tamién que RPA llegó a emitir una vez al mes partíos de fútbol n'asturianu. Sicasí, eso tamién desapareció esta llexislatura.

Tamién recuerden que la toponimia oficial nun s'usa en RPA y que namás s'emiten conteníos n'asturianu si tán pagaos pola Conseyería de Cultura o si son gratuitos pa la emisora pública. Con esto denuncien que la radio autonómica ta incumpliendo a les clares l'Estatutu d'Autonomía y tola llexislación que lu desarrolla.

Pa finar, denuncien que la dirección de RTPA, encabezada por Francisco Orejas, actúa como si TPA y RPA fueren cadenes privaes y monollingües en castellanu, y sigue negándose a cumplir cola llexislación. La XDLA  diz qu'ensin el papel activu de la RTPA ye imposible que se cumplan eses frases que tanto repite'l Gobiernu de "salvar l'asturianu" y "recuperar l'arguyu de ser asturianu".

Por eso, nel ecuador de la llexislatura, reclamen al Gobiernu y a los grupos parllamentarios pa que trabayen pa que se produza un cambiu na dirección de RTPA y acabar cola actitú contra l'asturianu que día a día muestren dende la dirección de RTPA.

Semeya: Imaxen d'un actu de la XDLA delantre de les instalaciones de la RTPA

Contador Estadistiques