La web del Conceyu de Xixón va cumplir un añu ensin versión n’asturianu

|
Portada web del Conceyu de Xixón

El xunu pasáu estrenábase la páxina web nueva del Conceyu de Xixón, que sigue ensin tener versión n’asturianu. Naquel momentu declarábase que'l portal taba entovía en desendolcu, pero un añu depués nin hai presencia del idioma nin funciona’l dominiu www.xixon.es, que redireiciona a la versión vieya.

Iniciativa pol Asturianu va treslladar al aconceyamientu de mañana del Conseyu Asesor de la Llingua de Xixón esta ausencia del asturianu nuna ferramienta comunicacional tan importante qu'hasta'l cambiu sí contaba con versión n'asturianu y n'otros idiomes como l'inglés, el francés, l'alemán y el rusu. “Vamos reclamar una solución pa que la llingua asturiana torne a tener presencia na web del Conceyu de Xixón”, asegura’l presidente Iván Llera, que considera que “nun tien xustificación qu’un añu depués de la presentación del nuevu portal l'asturianu siga ensin tener presencia dala”.

Inclusive afirma que “la Oficina de Normalización lleva meses tornando conteníos que depués nun se suben a la web, quedando munchos d'ellos desactualizaos”. La presencia del asturianu na páxina web municipal ye un mandatu recoyíu nel Plan de Normalización Llingüística pal periodu 2020-2023, en concretu nel puntu 16, aprobáu por mayoría nel Plenu municipal d'agostu, que manda “emplegar l'asturianu nos conteníos institucionales de la nueva páxina web municipal xunto col castellanu, teniendo d’equiparar pasu ente pasu los demás conteníos, asina como los de les empreses municipales”.

Contador Estadistiques