La Vuelta a Asturies repite entamu y final d'etapes, y incorpora'l Tenebreo na decisiva

|
Tercer etapa de La Vuelta a Asturies 2023

El llibru de ruta de la carrera, que va celebrase del 28 al 30 d'abril, nun respeta la toponimia oficial, que sí apaez nel cartelu promocional.

Uviéu, La Pola (Ḷḷena), Candás, Cangas del Narcea y Uviéu repiten como puntos de salida y final de les trés etapes de la LXV Vuelta a Asturies-Julio Álvarez 'Mendo'. El Club Ciclista Aramo ta acabante de dar a conocer el percorríu, qu'incorpora'l Tenebreo na última xornada en sustitución d'El Violeo.

La primer etapa va partir el vienres 28 d'abril del Centro Comercial Los Prados, con pasu per La Collaona y, a falta de pocos quilómetros pa la meta en La Pola, per Carabanzo, puertu de tercera siempre decisivu pola so cercanía a la capita de Ḷḷena. L'Acebu va protagonizar el segundu día, con salida en Candás, pero otru añu más nun va ser final, sinón Cangas del Narcea depués d'un frenéticu descensu.

La xornada decisiva va allargase con respeuto a otros años. Van ser esti añu 149 quilómetros ente Cangas y Uviéu, col Tenebreo, a 17,5 de la cai Uría, como última oportunidá pa romper la carrera, qu'aumenta'l total a percorrer pol pelotón estos trés díes a 513, la distancia más llarga de les ediciones últimes.

Sí en La Vuelta a España

A diferencia de La Vuelta a España, que sí cumple cola toponimia tradicional, La Vuelta a Asturies nun incorpora los nomes de llugar oficiales. Éstos namái los emplega nel cartelu promocional de la carrera nos entamos y final d'etapa.

Cuatro etapes nel 2025

La intención de la organización de La Vuelta a Asturies ye la d'ampliar nel 2025 la competición a cuatro etapes. La idea ye llevar la prueba al oriente del país.

Na imaxe, percorríu de la tercer y última etapa d'esta edición, ente Cangas del Narcea y Uviéu, que tien la novedá del pasu pel Tenebreo.

 

Contador Estadistiques