“‘La vida en cuatro lletres’ tien en tou momentu un tonu divulgativu y mui fácil de siguir”, apunta Menéndez Caravia

|
Xurde Menéndez Caravia vidu 'La vida en cuatro lletres'

“Interés y ganes por deprender” ye lo único que se necesita pa siguir el filo de ‘La vida en cuatro lletres’, el primer ensayu científicu divulgativu de Carlos López-Otín, que trai al asturianu Xurde Menéndez Caravia con Ediciones Trabe. Nesti videu p’Asturies.com el traductor fala sobre esti llibru, que va destinar tolos sos beneficios a les families asturianes de pacientes con cáncer.

“Cuento que pue tener munchu interés non sólo pal públicu en xeneral, sinón tamién pa tolos profesores y estudiantes, y pa toles persones que tengan un interés xeneral na ciencia”, apunta Menéndez Caravia sonbre ‘La vida en cuatro lletres’, trabayu que “tien en tou momentu un tonu divulgativu y mui fácil de siguir”. “Inclusive hai materiales que se pueden emplegar pa la divulgación de les diferentes ciencies naturales y pensamos que ye una contribución interesante pa desplegar el léxicu científicu n’asturianu nun contestu tan maraviyosu como un llibru que fala de la felicidá”, añade l’investigador posdoctoral nel llaboratoriu del doctor Eric Olson na UT Southwestern Medical Center de Dallas, onde s’estudia la bioloxía y les enfermedaes del corazón y d'otros músculos.

Y ye que la felicidá ye’l tema sobre’l que xira esti primer trabayu de López-Otín, aragonés de Samianigo y caderalgu de Bioquímica na Universidá d’Uviéu, dientro d’una triloxía sobre la vulnerabilidá humana. Tou un ésitu en ventes qu’agora podemos disfrutar n’asturianu gracies al llabor de Menéndez Caravia, que nesti videu nos da más detalles d’esta obra –que na versión asturiana cuenta con ilustraciones inédites d'autores del país qu'ayuden a pescanciar, dende la perspectiva del arte, los temes que se traten– compuesta por 14 capítulos “polos 14 díes de felicidá que, colos criterios del califa cordobés Abderramán III, primer humanu que s’atrevió a cuantificar la felicidá, ye’l máximu que tenemos permitío la especie humana”.

Contador Estadistiques