La vaca asturiana, de certame

L'Asociación de Criadores de Raza Asturiana de los Valles (ASEAVA) y l'Ayuntamientu de Cangas del Narcea organicen dende ayeri y hasta esti domingu en recintu ferial de La Himera de Cangas del Narcea el XVI Concursu Subasta Nacional de Raza Asturiana de los Valles. El númberu de ganaderíes participantes nesti certame ye de 165, con un total de 400 animales, de los que van salir a puya 55.

El presupuestu del concursu ye de 81.000 euros, destinándose cásique les tres cuartes partes d'ellos a subvencionar a los ganaderos en conceptu de dietes, tresporte del ganao y alimentación.

L'oxetivu del certame ye la meyora de la cabaña ganadera d'esta especie autóctona del país productora de carne de gran calidá lo mesmo que del sistema d'esplotación de los praos de montaña, afalando a la cría d'animales de races pures y de gran valor xenéticu. Nesti sentíu, la organización destaca qu'añu tras añu vien notándose'l progresu del grau de selección de la cabaña ganadera que vien al concursu

Como complementu al concursu, y con un evidente ganchu turísticu, xunta la celebración del certame ganaderu faise tamién una Feria d'Artesanía qu'aconceya a artesanos del conceyu de Cangas del Narcea y d'otros llugares d'asturies, mientres que la Xunta Local d'Hostelería organiza pela so parte les VII Xornaes Gastronómiques de Carne de la Raza Asturiana de los Valles, que pue comese nos restoranes del conceyu acompangada de vinu de la Tierra de Cangas.