La UEFA nun va dexar fumar nos estadios de la Eurocopa 2012

|

La tradición del puru nos campos de fútbol, al menos a nivel profesional, paez tar más cerca del desaniciu. La UEFA anunció que nun va dexar fumar nos estadios de la Eurocopa 2012 de Polonia y Ucrania nin vender tabacu na so redolada.
 
La regulación va aplicase, ensin esceición, a tolos espacios nel perímetru de los estadios, tanto dientro como fuera, según confirmó l'organismu rector del fútbol européu, que desarrolló esta política en collaboración cola Organización Mundial de la Salú (OMS), la Federación Mundial del Corazón, la Rede Europea d'Estadios Saludables y les autoridaes llocales polaques y ucranianes. "Una Eurocopa llibre de tabacu va ser una señal de respetu a la salú de los aficionaos y de tol mundu rellacionáu col tornéu. Caltenemos los más altos estándares de salú, seguridá y 'confort' nel nuesu tornéu insinia y el tabacu nun s'adapta a ellos", señaló'l presidente de la UEFA, Michel Platini.
 
Zsuzsanna Jakab, direutora de la OMS pa Europa, cree qu'esta midida "tien muncho sen". "El consumu de tabacu mata y causa enfermedaes graves. Ésti ye un gran exemplu de lo que pue facese dientro del conveniu de la OMS pal control del tabacu, que yá ta marcando goles en toda Europa", resaltó. Pela so parte, Androulla Vassiliou, la comisaria europea responsable del Deporte, mostróse encantada cola decisión de la UEFA y sorrayó'l so impautu potencial más ampliu: "La Euro 2012 va ser un imán pa millones d'espectadores y aficionaos, asina qu'esto unvía un mensaxe poderosu y establez les bases pa otros eventos deportivos en tol continente". Amás, aprovechó pa encamentar a les ciudaes anfitriones a qu’aseguren que los tresportes públicos, los restoranes y les zones d'aficionaos tean llibres de fumu. “El fútbol y el deporte refiérense a la salú y al rindimientu, y el tabacu ye lo opuesto; nun s'entemecen", esplica Vassiliou.
 
Esta decisión de la UEFA paez marcar el camín de lo que van decidir les lligues locales nel futuru al respeuto del tabacu y sigue’l de la FIFA, que tampoco dexó fumar nel Mundial de Sudáfrica. Namái la Premier League y dalgunos clubes europeos, como l’Ajax o’l Bayer Leverkusen, nun permiten prender un pitu nos sos estadios. Mentes, nel Estáu yá esiste un precedente, yá que l’asamblea de socios del Barcelona celebrada’l mes pasáu decidió prohibir fumar dientro del Camp Nou gracies a 539 votos a favor, 89 en contra y 39 en blancu. Sicasí, la norma tovía nun se ta cumpliendo.
 
 
 

Contador Estadistiques