La UEFA almite a Xibraltar como “miembru provisional” del organismu tres una sentencia del TAS

|

Xibraltar –y los sos clubes– podría nun plazu breve competir internacionalmente tres la decisión de la UEFA d’almitir a la federación del territoriu británicu d’ultramar como “miembru provisional”. España anunció que va tratar d’evitalo.

Esti pasu dau pola UEFA vien por una sentencia del Tribunal d’Arbitraxe Deportivu (TAS, pol so acrónimu en francés) del 2011 tres les alegaciones presentaes pola Gibraltar Football Association tres la votación del 2007 na que’l restu de federaciones europees votaron en contra de l’almisión de Xibraltar como miembru de plenu derechu, coles esceiciones úniques de les cuatro britániques, esto ye, Inglaterra, Alba, Irlanda del Norte y Cymru. Agora, nel XXXVI Congresu Ordinariu de la UEFA, previstu en mayu en Londres, va facese otra vuelta esta votación, na que los xibraltareños confíen n’algamar el so oxetivu.

Tres conocese la decisión del comité executivu de la UEFA, España nun tardó en pronunciase en contra. Asina, el ministru d’Educación, Cultura y Deporte, José Ignacio Wert, afirmó que tanto’l so ministeriu como’l d’Asuntos Esteriores van agotar toles víes xurídiques pa evitar que Xibraltar pueda participar nes fases clasificatories d’eurocopes y mundiales –cola posibilidá de la disputa un España-Xibraltar–, y los sos clubes na Lliga de Campeones o na Lliga Europa. Anguaño, el Peñón cuenta con 29.000 habitantes, cifra que nun impide la esistencia de tres categoríes de fútbol nel llugar, con una Primera División formada por seis equipos. El xugador más destacáu que salió de Xibraltar foi’l porteru Tony Macedo, que xugó nel Fulham ente 1955 y 1968, la mayoría d’ellos en Primera División. Sicasí, el xibraltarín nunca pudo xugar a nivel internacional por nacer nun territoriu non reconocíu.

Hai que destacar que les federaciones xibraltarines d’otros deportes importantes sí tán reconocíos poles confederaciones internacionales, casu de la de baloncestu (FIBA) y la d'atletismu (IAAF).

 

Contador Estadistiques