La UABRA cumple diez ediciones con una ufierta consolidada

|
UABRA Escuela-Hogar

Cangas del Narcea va acoyer del 29 de xunetu al 9 d’agostu la décima edición de la Universidá Asturiana de Branu (UABRA), heredera de los cusos de branu de l’ALLA n’Ibias. Con más de 150 participantes, ente alumnáu y profesoráu, cuenta con una ufierta consolidada de siete cursos y actividaes paraleles.

Foi nel añu 2010 cuando s’estrenaba, un 2 d’agostu, la UABRA gracies a un alcuerdu cola Universidá d’Uviéu y el Conceyu de Cangas que se caltién anguaño. L’oxetivu yera abrir los cursos a la sociedá, incorporándolos a la ufierta d’estensión universitaria, y la investigación de la realidá social y cultural del país.

Diez ediciones depués, tres el pasu de centenares de persones peles sos aules, esta iniciativa vive’l so meyor momentu baxo la direición de María Cristina Valdés, con una ufierta consolidada y una programación complementaria na que destaca l’entamu de cuatro conferencies qu’afonden en temátiques científiques, sociales o llingüístiques. A ello hai que sumar una esposición, conciertos o teatru.

Los cursos

Como ye vezu, l’Academia de la Llingua Asturiana (ALLA) ufre na UABRA el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que consten de 60 hores llectives mientres les dos selmanes de clases. Alberto Fernández Costales, académicu nuevu de la institución, ye’l coordinador del primeru, mentes que Margarita Fernández Mier encárgase d’esi llabor nel segundu.

No que respeuta al ‘Curso de Gallego-asturiano’, tamién de 60 hores, esti añu desendólcase la primera fase de les trés de les que se compón el Programa de Capacitación en Gallego-asturiano pra Profesores, titulación esixida pa dar la materia en Primaria y Secundaria. Los trés cursos tienen un costu de 300 euros, cantidá qu’inclúi los materiales y la pensión completa na Escuela-Hogar de Cangas.

A esta ufierta hai que sumar los ‘Cursos d’Afondamientu Cultural y Llingüísticu’, de 35 hores llectives caún, que tienen un costu de 190 euros too incluyío. Na primer selmana, del 29 de xunetu al 3 d’agostu, va ponese ‘Capacitación pa la traducción al asturianu’, dirixíu por Marta Mori, y ‘Educación y nueves teunoloxíes multimedia’, empobináu por David Melendi, nel que van formar parte de profesoráu Fernando de la Fuente y David Guardado, cofundadores d’Asturies.com.

Del 5 al 9 d’agostu va ser el turnu de ‘El patrimoniu cultural asturianu. Un averamientu dende l’enguedeyu de lo tanxible y lo intanxible’, dirixíu por Jesús Fernández Fernández’, y ‘De la lletra al testu: taller d’escritura creativa’, con Aurelio González Ovies al frente. Tolos cursos, cola esceición única del de gallego-asturiano, formen parte tamién de los Cursos d’Estensión Universitaria, dirixíos a los estudiantes de toles estremaes carreres de la Universidá d’Uviéu, cola posibilidá de sumar ente 5 y 6 creitos de llibre configuración.

La matrícula pa la UABRA va tar abierta ente’l 20 y el 31 d’esti mes. Pa formalizala ye necesario acudir al llar de l’ALLA (L’Águila 10, Uviéu) de llunes a xueves, de 9 a 15 y de 16 a 19 hores, o de vienres, de 9 a 14 hores.

La inscripción faise en rigurosu orde de llegada. Nesi sen, hai que tener en cuenta que los cursos suelen cubrir la totalidá de les places ufiertaes.

Xeres complementaries

La esposición itinerante ‘Voces. La llingua asturiana al traviés de los sieglos’, que yá tuvo como sedes el Muséu Arqueolóxicu d’Asturies, n’Uviéu, y la Casa la Cultura María Xosefa Canellada, en Santolaya, va aportar a Cangas con motivu de la UABRA. La Casa de la Cultura Palaciu d’Oumaña va acoyela.

Les xeres complementaries previstes pa estos díes, abiertes a tola ciudadanía, complétense con cuatro conferencies nel salón d’actos de la Escuela-Hogar, con comienzu a les 19 hores toes elles. La primera va ser, el 30 de xunetu, ‘L’osu n’Asturies: implicaciones sociales y económiques’, a cargu de Víctor M. Vázquez, biólogu y miembru numberariu del RIDEA, pa siguir el 1 d’agostu con ‘Úa television pública al servicio d’Asturias’, de Cristóbal Ruitiña, periodista de RTPA.

Na segunda selmana, el día 6, Raúl Suevos, analista de seguridá internacional, va falar de ‘La política de defensa n’Europa. Análisis xeopolíticu y alternatives’, mentes que la intervención del 8 va dedicase a los ‘Exes de la política llingüística n’Asturies’, con ponentes entovía por confirmar. Amás, va haber espaciu pa la música nel Teatru Toreno’l 31 de xunetu y el 7 d’agostu con L-R y A Comuna del Barruzo, de manera respeutiva, actuaciones con comienzu previstu pa les 22.30 hores.

Contador Estadistiques