La TV vótase'l día 14

La Xunta Xeneral del Principáu somete'l día 14 d'esti mes de marzu a votación el proyectu de Llei sobre la TV autonómica, que la mayoría socialista na cámara va permitir que se dea de pasu ensin mayor problema. Cumpliendo conm precisión de maquinaria cola fecha prevista, l'executivu quier tener la cadarma llegal de la canal autonómica preparada pa cuando lleguen les elecciones, anque la canal nun va poder emitir hasta en pasando la cita coles urnes del 25 de mayu. Ensin dulda, una de les grandes incógnites que queden por despeyar sobre la tv autonómica va ser la presencia de la llingua asturiana nes emisiones. Yá de la que se fizo en mes de payares la ronda d'intervenciones de colectivos sociales y profesionales intresaos nel tema viose qu'había postures bien distintes. Mientres l'Asociación Periodistes pol Asturianu y l'Academia de la Lingua falaron d'aplicar un sistema dual (que l'espectador pueda escoyer en que llingua quier ver la programación) amás d'un 50% de programación n'asturianu, laXunta Pola Defensa de la Llingua Asturiana defendió dende qu'entamó'l debate sobre la Tv asturiana el 100% de programación n'asturianu. Agora, la Xunta Xeneral, acabante de rechazar la enmienda a la totalidá del PP a la llei de la TV, tampoco nun va facer casu de la propuesta del grupu parllamentariu d'IX, que pidiere un 50% n'asturianu y que tamién propunxó delles midíes p'afitar la independencia de la TV. Pela so parte, la Xunta Pola Defensa de la Llingua tamién apuntó nun comunicáu les sos crítiques al modelu de TV a debate, faciendo un llamáu a que l'asturianu nun muerra, que ye lo que va pasar según la organización cívica de dase de pasu esti proyectu