La TV, estrella nel Día de les Lletres

Más de mil persones asistieron esti vienres a la tradicional manifestación del Día de les Lletres Asturianes qu'organizaba la Xunta Pola Defensa de la Llingua Asturiana. L'asistencia menguó una migaya por culpa de ser pa munchos ponte del primer de mayu, pero ello nun quitó relevancia nin repercusión a una reivindicación, la de la oficialidá, que volvió a tomar la cai, esta vegada en viéspora de campaña electoral y cuando ta acabante d'aprebase la llei que va regular la TV asturiana, un elementu que se camienta clave na recuperación del idioma.

La novedá d'esti añu ye que foi la primer vegada que la másima institución del idioma, l'Academia de la Llingua, y la Conseyería de Cultura celebraron el día de les Lletres per separao depués de que la institución que preside Ana Cano decidiere francer rellaciones col organismu del Principáu. El conseyeru de Cultura, J. Fernández Vallina, intentó acabar cola resquiebra ente dambes instituciones y consiguió xusto lo contrario
con Unes declaraciones sobre l'emplegu de l'asturianu na futura TV autonómica que nun dexaron a naide contentu. En declaraciones nun de los actos oficiales del Principáu, Vallina espuso la idega de que la TV autonómica emitiere con subtítulos n'asturianu o en castellanu dependiendo del idioma orixinal en que fuere'l programa, y tamién dar aescoyer l'idioma en que quixere sentise la emisión en casu de ser tv dixital y de tener medios pa ello. Estes propuestes, que nun tienen en cuenta la comprensibilidá que se da ente dambos idiomes, merecieron la crítica de la presidenta de l'Academia de la Llingua, que respondió énte esta propuesta que-y abultaba una tontería y demostraba que na conseyería nun hai un modelu de lo que quier facese nesta estaya. Dende la Xunta Pola Defensa de la Llingua Fernando Balbuena dixo qu'esta yera una propuesta "de cara a la galería" y "propia d'un inutil pa dase un barnizucu de cara a eles elecciones, siendo una propuesta que nun cubre los mínimos necesarios" unos mínimos que pa la Xunta pasen por facer una TV n'asturianu dafechu