La solicitú de votu per corréu pue facese hasta’l 12 de mayu

El Gobiernu ofreció esti martes datos nuevos sobre les eleiciones del 22 de mayu, yá convocaes de manera oficial tres la publicación nel BOPA del decretu firmáu’l llunes pol presidente. El votu per corréu va poder solicitase hasta’l 12 de mayu.
 
Les persones residentes n’Asturies que quieran optar por esta alternativa de votu yá pueden solicitar en Correos el certificáu d’inscripción nel censu eleutoral. Díes depués, recibirán en casa tola documentación necesaria coles papeletes de les formaciones que participen nel 22-M pa que puedan escoyer el so votu. El plazu pa remitir el votu per vía postal va allargase ente’l 2 y el 18 de mayu.
 
 Mentes, los residentes n’otros estaos que tean inscrites nel Censu d’Eleutores Residentes Ausentes (CERA) van recibir un impresu de la Oficina del Censu Eleutoral pa que soliciten del 29 de marzu al 23 d’abril tola documentación elutoral necesaria. Esi formulariu, según anunció güei María José Ramos, conseyera de Presidencia, Xusticia y Igualdá, tamién ta a disposición de los elecutores nos consulaos y seiciones consulares, amás de poder descargarse dende la web del Ministeriu d’Asuntos Esteriores y nel portal eleutoral del Gobiernu dende'l 1 d’abril. Una vez fechu esti trámite, los residentes ausentes deben mandar el votu per corréu al consuláu enantes del 17 de mayu, o depositalu na urna de manera presencia los díes 18, 19 y 20.
 
Ramos anunció que tienen derechu a votu nes eleiciones del 22 de mayu un total de 990.341 electores –906.116 residentes y 84.225 del CERA–, de los que 17.775 van poder votar per primer vez na so vida. Del 4 al 11 d’abril van publicase los censos pa la revisión de posibles errores y éstos van quedar zarraos de manera definitiva’l 15 d’abril. El númberu de meses eleutorales d’estes eleiciones van ser 1.642, ocho menos que nel 2007.
 
Otra manera, los votantes ciegos o les persones con problemes de visión, yá pueden solicitar, hasta’l 25 d’abril, el nomáu sistema de votu accesible, que va estrenase nunes eleiciones nacionales. Los interesaos nesta opción van poder pidir esta opción nel telefónu 012 del Serviciu d’Atención Ciudadana o per corréu electrónicu a la direición sac@asturias.org. Estes persones, el día de les eleiciones, van recibir un kit eleutoral na so mesa correspondiente coles papeletes en braille, que van poder lleer con tranquilidá nun espaciu acutáu pa ellos nel colexu eleutoral.