La solar echa a andar nos Ozcos

El conceyu de Vilanova d'Ozcos y la empresa Terranova Energy, que ye la titular del parque eólicu del conceyu, tan acabante d'echar a andar una esperiencia pilotu pal aprovechamientu de la enerxía solar en conceyu. La preba ta faciéndose en teyáu del polideportivu del conceyu onde 33 plaques solares van intentar convertir en corriente les 982 hores de sol que se perita que tien el conceyu.

El gobiernu asturianu, que subvencionó la obra con 5.300 euros, ye ún de los entes que financien esta esperiencia que tien un presupuestu total de 51.000 euros (ocho millones y mediu de les antigües pesetes) mientres que la empresa Terranova Energy fízose cargu del restu de la financiación.

Les estimaciones de la empresa cuenten con que la fotovoltaica dea un beneficiu de 2.040 euros al añu, cantidá que pue variar acordies cola insolación que se rexistre. El 40% del beneficiu xeneráu pola corriente, que va vertese a la rede comercial, diría directamente pal conceyu.