La Sociedá d'Autores va dar premiu a la meyor canción n'asturianu

L'anuncia, que satisfaz una reclamación de vieyo de los músicos asturianos, ta acabante de dala'l responsable p'Asturies de la Sociedá Xeneral d'Autores Javier Vidal nel marcu de la presentación del Anuariu de la Música Asturiana, qu'edita la casa de discos l'Aguañaz.

Según-yos esplicó Javer Vidal a tolos presentes nel actu, los premios qu'entrega tolos años la SXAE a los trabayos musicales más importantes del añu van tener yá nesta edición del 2003 una categoría acutada pa la meyor canción en llingua asturiana. Esta decisión iguala a l'asturianu con toles demás llingües del estáu, que tienen, dende va años, un premiu específicu ente los galardones que da la SXAE. Remata asina, con final felíz, una auténtica culiebra informativa que llevaba ocupando sitiu nos medios dende va años, con especulaciones d'unos y d'otros acerca de si diba dir d'esta o non.

Sicasí, entovía queden flecos por iguar, y ye que, anque Javier Vidal esplicó que yá tan rexistraes toles canciones que puen concurrir a esti premiu que va dase nel mes d'abril, tamién reconoció a entruga d'Asturies.com que, en cuantes que la decisión de dar el premiu asturianu vieno con retrasu respective al proceder normal de los premios, entovía nun s'apautó por qué procesu va escoyese al cantar ganador, que tendrá de salir de lo muncho que s'espublizó nesti añu 2.003. El procesu normal pa esti premiu ye que les cases de discos apurran unos candidatos colos que la SXAE igua un llistáu nel qu'apaecen les nominaciones definitives pa someteles a votación, pero, en cuantes qu'esi procesu yá ta fechu pa tolos demás premios, ello pue obligar a una solución d'urxencia qu'entovía nun se sabe en que va consistir.

L'anuncia de Javier Vidal, cola que naide nun contaba, garró de sorpresa a tolos presentes a un actu nel que taben los nomes más importantes de la escena musical asturiana, y les primeres impresiones que se dieron foron bien positives. Asina, Xune Elipe, cantante del grupu Dixebra y responsable de la casa de discos L'Aguañaz, editora del anuariu que se presentaba güei, esplicó qu'esta yera una bona noticia, anque a elli quedába-y la dulda de qué procedimientu va facese pa dar el premiu.