La SGAE asturiana pide un premiu pa la música n'asturianu

Los socios asturianos de la Sociedá Xeneral d'Autores y
Executantes, SGAE, decidieron ayeri n'asamblea pidir la creación
d'un premiu pa la meyor cación n'asturianu dientro de los galardones qu'entrega tolos años l'academia de les Artes y les Ciencies de la Música.



La delegación n'Asturies de la SGAE decidió ayeri pela tarde pidir a
l'Academia de les Artes y
les Ciencies de la Música la creación d'una nueva
categoría nos Premios de la
Música, qu'esta academia entrega tolos años y nos qu'hai categoríes específiques pa trabayos discográficos nes llingües propies d'Euskadi, Galicia y Cataluña, les
tres comunidaes autónomes con llingua oficial propia y reconocida na
Constitución española. El valencianu tamién entra nos premios con categoría propia, y llama l'atención qu'esti idioma, con una producción bien pequeña, tenga categoría pa ello cuando l'asturianu, idioma en que se fai cerca de la metada de la producción musical asturiana, nun ta presente nos premios.



La iniciativa, que s'aprobó por unanimidá, agora tien que dala de pasu l'asamblea estatal de la SGAE en Madrid, onde va presentar la propuesta'l representante asturianu, Pipo Prendes na xunta del 29 d'abril. Depués, esta asamblea va ser
la encargada de facer la petición formal a l'Academia, que tien la pallabra postrera. Fontes de la SGAE asturiana consultaes por Asturies.com dixeron que nun ven que la institución vaya poner torga nenguna pa la creación
d'esti premiu, y solliñaron que-yos llamaba l'atención que'l valencianu, con una producción musical mui pequeña tuviere categoría propia nos premios y que l'asturianu quedare fuera cuando ye l' idioma en que se fai cerca de la metada de la producción musical del país.