La selmana zarró con 22.003 contaxos

|
Autocovid antíxenos

Rexistróse una media de 3.143 casos nuevos diarios que nun fixo medrar la hospitalización.

La selmana pasada siguió la tendencia ascendente de contaxos, superándose tolos récors del andanciu. Rexistráronse 22.003 positivos, al pasar de 120.787 –llueu d'una actualización de datos dende los 120.668 comunicaos nel so momentu– a 142.790.

Supón 3.143 casos nuevos diarios, superando los 2.355 de la selmana anterior. Dende qu'Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905 y 2.355, hasta los 3.143 actuales.

Esta fin de selmana contabilizáronse 8.749 casos, que tamién superen la del anterior, cuando nun primer momentu informóse de 7.588. El vienres hebo 3.355, el sábadu 2.800 y ayeri 2.594.

Magar l'alta tresmisión, les hospitalizaciones nun medren. La xornada zarróse con 425, cuando hai una selmana había 427, anque si lo comparamos col xueves, día últimu d'actualización, cuando se rexistraron 406, sí hai un aumentu.

En planta tán ingresaes 369 persones, 19 más que, mentes que na UCI siguen 56. La ocupación total por esta patoloxía nos hospitales ye del 12,18 por cientu y del 18,24, de manera respeutiva.

Nestos trés díes hebo que llamentar 9 muertes: una muyer de 93 años y un home de 85, el vienres; trés muyeres de 90, 60 y 34, y un home de 86, el sábadu; y dos muyeres de 82 y 49, y un home de 77, ayeri. No que va d'andanciu perdieron la vida cola enfermedá causada pol coronavirus SARS-CoV-2 un total de 2.220 ciudadanos.

 

Contador Estadistiques