La selmana na bolsa

La selmana pintó bien pa los inversores énte un "rally" bursátil que dexó ablucáu a más d´ún analista financieru. La relativa calma nel conflictu iraquí foi la causa d´esti pieslle en positivo que permitió que l'Ibex xubiere un 4% esta selmana pasada p´asistiase nos 5.904,90 puntos. La cota de los 6.000 puntos ya nun ta lloñe, anque los analistes dulden d'un cambéu na tendencia de los mercaos y ven nesti repunte una xuba téunica. Mentantu el desarrollu de les negociaciones diplomátiques alrodiu del conflictu iraquí ye clave pales bolses, pendientes del resultáu de la propuesta alternativa de los países indecisos nel Conseyu de Seguranza de la Onu y del cume de les Azores esti fin de selmana. De toles maneres canta que los inversores que llevaben meses esmolocíos colos resultaos bursátiles aprovecharon pa mercar valores a baxu preciu.



La xuba de los precios n´Alemaña y Francia énte un escuru escenariu de desaceleración económica foi dalgún de los permalos datos macroeconómicos de la selmana pasada. Otres estadístiques señeres de la selmana espeyen el mal camín que tien garráu la economía: precios de la producción, la poca meyora de balanza por cuenta corriente con un 8,4% más, los inventarios mayoristes, la producción industrial y l'índiz de confianza de la Universidá de Michigan. Otramiente, el Bancu Central Européu (BCE) d´anuncia de la posibilidá de baxar los tipos d´interés otra vegada más si se fai la guerra escontra Irak.



La selmana entamó con una caida llibre de les bolses énte una probabilidá de guerra evidente. Amás hebo malos resultaos empresariales de Volkswagen y sobremanera de Deustche Telekom, que con 24.600 millones d´euros de perda fizo record n´Alemaña. El miércoles l'Ibex raspió'l fonfu con 5.452,40 puntos. Pero a mediaos de la selmana tornaron les espectatives inversores cola xuba teúnica y tanto les bolses del Vieyu Continente como Wall Street entamaron un "rally" alcista col que nun se contaba, marcando na bolsa madrilana valores de más del 8% BBVA, Endesa y Telefónica más d´un 4% y Iberia y Amadeus alredor del 5%.



La estrella de la selmana foi l'anuncia d'OPA de Gas Natural sobre Iberdrola col sofitu de La Caixa y castigada polos inversores con baxaes penriba´l 10% na cotización de la gasista. Si la empresa gasísitica mercar mercase Iberdrola taríemos falando de la tercer compañía d´electricidá y gas europea por capitalización bursátil con más de 13 millones de clientes, pero Iberdrola nun quier saber de la OPA al considerala mui perbaxo del valor real de la empresa.

Nel mercáu de divises el dólar ta recuperándo-y terrén al euru, algamando ya la equivalencia los 1,07 dólares. El preciu del petróleu aguanta perbaxo los 33 dólares el barril, anque mui lloñe de la banda 22-28 dólares barril que consideren los países de la OPEP pa una estabilidá del mercáu.