La selmana na bolsa

Otra vegada más, el pieslle selmanal de la bolsa ye malu. Anque'l Bancu Central Européu (BCE) fizo por ello, la baxada de tipos d'un cuartu puntu nun-yos prestó a los inversores, y anque agora los tipos d´interés na Zona Euro son de 2,50 puntos, los inversores contaben con que'l BCE los punxere nos 2,25 puntos. Mientres la bolsa sigue gafa, el Conseyu de Seguranza de la ONU y el conflictu iraquí foron protagonistes esta selmana. El conflictu iraquí sigue colingando nel aleru del teyáu económicu, neto que los resultaos empresariales y les estadístiques económiques. L'Ibex asistióse nos 5.716,50 puntos faciendo un nuevu mínimu anual, y toles places europees tan en perda.



Ente les estadístiques más señeres de la selmana destaquen la baxada del gastu de los consumidores y de l´actividá manufacturera nos Estaos Xuníos, retrocesu d'un 1,9% de les ventes al detalle na Zona Euro y el datu de la poca confianza de los consumidores franceses. Ensin dulda el datu estrella foi la xubida del paru nos Estos Xuníos, que xubió un 5,8% cola destrucción de más de 300.000 puestos de trabayu. Amás hubo muncha espectación col Llibru Beige qu´espubliza la Reseva Federal onde se fai un repasu de les males perspectives macroeconómiques, amenazaes agora por un conflictu bélicu que pon en peligru la recuperación económica



Y eso que la selmana entamare coles bones noticies del fin de selmana. Pero yá el martes tornaron llastres vieyos coles estadístiques espublizaes. Les grandes empreses españoles instalaes n'Arxentina llevaron un disgustu grande, especialmente pal BBVA y el SCH, al resolver el Tribunal Supremu arxentinu escontra col corralón que tien secuestraos los aforros de la xente. Xunta esto, hebo pocu volume de negociu na bolsa madrilana al nun tener los inversores muncha gana de siguir engordando les perdes nes sos carteres, anque pa perdes les de France Telecom, que rexistró 20.700 millones d´euros de resultáu negativu nel 2002. La estrella de la selmana foi la inmobiliaria Metrovacesa, que repartió bien de perres ente toles empreses con participación nella. Les compañíes italianes Caltagirone y Marchini que tan a al gueta de facese con Metrovacesa dan anuncia de que van meyorar la so ufierta dientro pocu nun intre en que l´aición de la inmobiliaria ya val 23,83 y tien munches posibilidaes de tocar los 25 euros por aición.

La bolsa sigue perbaxo los 6.000 puntos nel Ibex, fechu que diz abondo de lo feble del mercáu. Cola guerra cociendo, los inversores preparen la salida de los mercaos. Otramiente, l'Euro ta xubiendo énte un dólar muy atacáu polos especuladores, marcando un másimu hestóricu del de 1,10 dólares. Mal tiempu pa la bolsa, perbono palos bonos a 10 años y meyor pa posibles compres d´empreses na bolsa énte los baxos precios de dellos valores.