La selmana en bolsa

El selectivu Ibex-35 peslló en negativo tres d'una selmana de movimientos planos nes bolses internacionales y na que'l vencimientu d´opciones y futuros tiró poles febles xubes nos mercaos. L´Ibex pieslló'l vienres en 6.900,40 puntos con una cayía del 0,65%, rescamplando les importantes cayíes de los bancos. Mentantu, la moneda europea anda yá nos niveles que tuviere n´Abril, llegando dempués de delles selmanes de cayíes a cotizar nos 1,12 dólares.



La Bolsa de Madrid foi a la contra que les bolses europees, a lo menos el vienres. Les opciones y futuros, los grandes bancos, la inestabilidá en Wall Street y el pocu enfotu de los inversores a la hora d´arriesgar dexaron l'ibex en 6.900,40 puntos, perbaxo de la cota psicolóxica de los 7.000 puntos. El vienres el volume de negociu medró hasta los 2.343 millones d´euros, vola esnidiosa Zeltia d'estrella al xubir penriba´l 6% hasta los 6,17 euros. La biotecnolóxica gallega t´acabante d´entamar un períodu de munchos blincos que ye la cuenta pa los especuladores. Ferrovial tamién xubió penriba´l 2%. Nel lláu de les perdes destacaron Mapfre y Sogecable dempúes d´unos díis de xubes esaxeraes. Tamién tuvo perdes nel parqué NH Hoteles pola OPA agresiva que-y plantegó'l grupu Hesperia. El Grupu Telefónica nun tuvo bona selmana, colos inversores vendiendo papel de TPI, Terra y Telefónica Móviles.



El preciu del oru prietu caltiense con 28,8 dólares barril. Según diba pasando la selmana, el preciu del petróleu garró un poco de fuercia, anque trancó la selmana perbaxo de los 29,5 dólares de la otra selmana. El mercáu d´esta materia prima va aposentar na banda alta de 27-30 dólares mientres que la OPEP per un llau y la política enerxético d´Estaos Xuníos por otru, nun camuden l'escenariu d´anguaño.

Perimportante cayida de la renta fixo norteamericana poles males perspectives de recuperanza económica. De fechu la delda d´Estaos Xuníos baxó hasta'l peor nivel de los últimos cuatro meses. N´Europa la renta fixo nun tuvo tampoco una bona selmana, con cayíes del preciu de la delda público. Otramiente sí que convencieron a dellos inversores les bones perspectives económiques qu'anuncien dende la Secretaría del Tesoru de la primer potencia del mundu. El casu ye que'l dolar yá lleva delles selmanes garrando fuercia mentantu l´euru tá en cayida llibre. Parez que´l BCE nun ye a parar la perda de valor de la moneda europea, anque con ello los grandes exportadores europeos parez que respiren.