La selmana en bolsa

La selmana entamó col nivel de negociación más baxu dende va delles selmanes na Bolsa de Madrid, con solo 924 millones d´euros negociaos. A primeros de selmana la relaxación del conflictu iraquí benefició a los mercaos, y ye que tolos inversores tan siguiendo'l desarrollu de la situación mui de cerca. A mediaos de selmana, la Bolsa de Madrid baxó del nivel de los 6.000 puntos xunta les demás places europees. Wall Street, que trancó'l llunes, tampoco nun acompañó'l restu de la selmana. Otramiente, sofitaron les baxaes les estremaes estadístiques y datos empresariales que s´espublizaron, anunciándose nueves rebaxes de crecimientu económicu en Europa hasta asitialu nel 1,4% anual, estimación que se comprende en conociendo la cayida del 1,5% de la producción industrial na Zona Euro y la mengua del 4,4% de los pedios industriales alemanes, exemplos del escuru panorama que pinta anguaño pa la economía europea, pa la que lo más importante son siempres los síntomes de la máquina que tira por ella, Alemaña, qu'apunta a una crisis mayor. Estes noticies vienen a apaecer cuando ta debatiéndose estos diis alrodiu la flesibilización del Pautu d´Estabilidá na Europa común. Pa finar la selmana, la Bolsa de Madrid cásique perdió la cota de los 6.000 puntos al zarrar en 6.043. Les demás bolses europees trancaron en positivu, pero con resultaos mui probetayos al tar los inversores esmolecíos cola crisis iraquí. Ente los datos importantes que se conocieron esta selmana tuvo'l del IPC de Estaos Xunios: el 0,3% pol incrementu nel gastu enerxéticu. Esti datu foi bien recibido polos inversores. Wall Street intenta piesllar el vienres en positivu anque los acontecimientus nun faigan por ello. Mentantu'l proyeutu de guerra escontra Irak siga p´alantre el preciu del barril de petróleu nun va baxar, sino tolo contrario, pudiendo llegar a los 40 dólares el barril, pa lo que tamién hai que tener presente la situación en Venezuela. Ye nidio pa tolos analistes y espertos económicos qu'una guerra del calter que tien la que quier facer Estaos Xuníos ye mala pala la economía mundial.