La selmana de los chicharros

Selmana de xubes nos mercaos bursátiles mientres que la moneda europeo xubió ensin tope nun mercáu de divises cada vegada más especulativu que foi de más a menos, anque con un volume de negociu curiosu. Nel mercáu madrilanu dellos analistes tan ablucaos poles tremendes xubes de los "chicharros" o valores de pequeña capitalización y solvencia duldoso

L´anuncia de la selmana foi'l mal datu de paru nos Estaos Xuníos. Les estadístiques d´emplegu de la primer economía del Mundu, que namás creó un terciu de los puestos de trabayu con que se contaben, tiraron p´abaxu pelos mercaos internacionales, entamando pol americanu. Los índices Dow Jones y Nasdaq tuvieron perdes alrodiu'l 1% al finar la selmana.



Nes bolses del Vieyu Continente, el peor día foi'l vienres, con cayíes xeneralizaes, pesllando Llondres, Francfort y París con perdes ente´l 0,16% y el 0,94%. Sicasí, Madrid tuvo una perbona selmana na que medró'l selectivu Ibex un 1,31%, con munchu movimientu na renta variable. El vienres pasáu l´Ibex-35 tuvo un pieslle negativu pa terminar nos 7.348,10 puntos, lo que foi una cayida del 0,26%. Al ser el llunes festivu, dellos analistes xustificaron la baxada del vienres a cuenta d'ello al querer los inversores trancar posiciones en dellos valores y nun esperar al martes pa terminar operaciones ya entamaes. Pero ensin dulda les anuncies dende Estaos Xuníos xunta un axuste técnicu foron decisivos nel pieslle negativu del vienres. Les perdes tiraron p´abaxu a Arcelor, NH Hoteles y a Teléfonica Móviles. El Grupu Telefónica tuvo una bona selmana en xeneral, pero les perimportantes xubes de Móviles nes últimes xornaes nun pudieron caltenese.



L´anuncia en Gruu Telefónica foi el cambeu de presidente en Terra, que pasa a presidir Kim Faura, mientres que l'anterior presidente Joaquim Agut, va presidir la filial de Telefónica d´orixe holandés Endemol (la productora de TV responsable del Gran Hermanu). Otra de les anuncies de laselmana ye que ya queda poco pa saber quien va facese col control del Banco Atlántico anque ye dicen dellos banqueros que los favoritos son la portuguesa Caixa Xeral y el Banco Sabadell, titular de Banco Herrero y de Banco Asturias, qu'absorvió esti añu. Nes cotizaciones, la selmana pasada foi la de los "chicharros" con xubes de valores desconocíos como lFastibex (+26%) o Urbas (+100%). Compañíes toes elles con balances bien probetayos y delles raspiando la suspensión de pagos que son l'oxetivu de tou tipu d´especuladores que aprovechen los baxos precios del valor pa mercar el so papel y infla-y el preciu ensin xacíu.

Nel mercáu de divises sigue´l trunfu del euru énte un dólar que nun quier dase a valer. La selmana terminó cola sesta xuba hestórica del euru marcando 1,2165 dólares. Xunta la valoración que vien repitiéndose dende va meses del dañu que fai esto a la economía de la Xunión Europea, otros economistes yá falen de una devaluación encubierta del dólar, que taría depreciándose a costafecha p'afalar la esportación americana.