La selmana de les lletres, p'Andrés Solar

La Selmana de les Lletres Asturianes, qu'organiza la Conseyería de Cultura nel mes de mayu, va dedicáse-y nesti 2.004 a la figura y obra del poeta y escritor Andrés Solar cuando se faen los venti años de la so muerte n'accidente de tráficu en Sotrondio, cuando namás tenía 29 años. L'escritor de Deva (Xixón) vese anguaño como la d'un de los símbolos de la xeneración del surdimientu, dexando nos pocos años que trabayó una obra de gran valir. La celebración d'esta Selmana de les lletres va valir asina pa recuperar una obra poco conocía, y ye que, anque la Xunta Pola Defensa de la Llingua Asturiana caltién viva l'alcordanza del escritor gracies a la convocatoria de los premios que lleven el so nome, los escritos d'Andrés Solar son difíciles d'atopar. L'únicu llibru que contenía la so obra, recopilada en 1986 por Carlos Rubiera y Ramón d'Andrés, lleva años escosáu.