La seleición asturiana UEFA xuega en L'Entregu en busca del pase de fase

Yá se conoz la convocatoria de pa la decimotercer edición de la Copa de Rexones UEFA, con Murcia y Euskadi como rivales.

La seleición asturiana UEFA, compuesta por futbolistes mayores de 18 años que nunca xugaron en categoríes profesionales o firmaren un contratu non amateur, quedó encuadrada nel grupu 2, que va disputar los sos trés partíos nel Nuevu Nalón de L'Entregu. Toos van tener llugar al meudía, con entrada llibre pal públicu, y van poder siguise en direuto na canal de YouTube de la Real Federación Española de Fútbol.

El primeru va enfrentar a Asturies con Murcia'l vienres, mentes que'l sábadu va ser el turnu de murcianos y vascos. El choque contra Euskadi va tener llugar el domingu.

El seleicionador Clemente Sánchez, depués de dellos entrenamientos y amistosos celebraos estos meses, yá fixo la convocatoria definitiva, na qu'Asturies ha quedar primer pa pasar de fase. Compónenla los porteros Junquera (CD Lealtad) y Enol Ordóñez (UC Ceares); los defensas Alejandro Muñiz (Stadium), Busto (Praviano), Fonso Bellón (Urraca), Liam López (CD Tuilla), Vaamonde (SD Lenense); los centrocampistes Pablo Álvarez Gómez y Reyes (UD Llanera), Miranda (CD Tuilla), Mateo y Óscar Molina en sustitución del so compañeru, lesionáu d'última hora, Enol (UC Ceares), Meana y Montequín (CD Lealtad); y los delanteros Casas (Colunga), Sergio González y Monasterio (SD Lenense), y Damián Pérez Álvarez (Condal).

Galicia, actual campeón.

Asturies quedó campeona de la fase estatal d'esta competición nel 2001, mentes que na edición última, celebrada nel 2019, viose superada por Andalucía en Vícar. El campeón actual a niver européu ye Galicia, que superó precisamente a los andaluces por 2-0 en marzu del 2020, y que, depués de ser suspendida la fase final pola pandemia, derrotó na final absoluta a Belgráu esti xunu en Vilagarcía de Arousa por 3-1.

Na imaxe, un momentu del amistosu con L'Entregu celebráu nel Nuevu Nalón el 22 de payares con victoria del equipu llocal por 2-1. Semeya propiedá de la Real Federación de Fútbol del Principáu d'Asturies.