La seleición asturiana UEFA pierde la clasificación en 5 minutos

|
Capitanes y cuartetu arbitral Asturies-Galicia

Trés goles en contra consecutivos énte Galicia, combináu que pasa de ronda pese a perder con Cantabria, condenaron a Asturies.

El tantu de Javi Pazos nel minutu 30 nel partíu inaugural de la primer fase de la XI Copa de les Rexones UEFA ente Asturies y Galicia, disputáu nel Sergio Sánchez II d'El Berrón, supunxo un golpe duru pal equipu entrenáu por Luis Arturo, que vio como de siguío cayíen-y dos tantos más, obra del propiu Pazos y de Rodri Alonso. Nun se movería más el marcador y el 0-3 paecía dexar fuera a la seleición que, sicasí, llegaría con opciones a la cita d'ayeri con Cantabria.

Y ye que'l combináu cántabru superaba por 1-0 a Galicia'l sábadu en Ganzábal con un gol de Pablo Cano nel tramu final del partíu. Poro, Asturies necesitaba ganar de 5 goles a Cantabria nel so choque n'El Bayu pa poder superar a los gallegos, mente qu'a los cántabros valía-yos l'empate pa pasar a la fase intermedia de la competición.

El tantu inicial visitante nel minutu 10 de Juan Leguina, tres aprovechar un rechace tres un llanzamientu de falta, punxo too mui pindio a Asturies, que siguió compitiendo hasta llegar a ponese 2-1 colos goles de Jaime, de penalti (minutu 28) y Jairo Cárcaba (minutu 36). Leguina y Jaime, nel 50 y nel 81, marcaríen otra vuelta, pa poner nel añadíu Meana'l definitiu 4-2 que daba'l pase a Galicia.

El combináu entrenáu por Pichi Lucas va disputar la fase intermedia cola Comunitat Valenciana, que superó como llocal a Murcia (2-1) y Andalucía (3-1) nos sos dos partíos correspondientes al grupu D. La otra eliminatoria va enfrentar a Catalunya col campeón estatal actual, Castilla y Lleón, mentes que pasen direutamente a la fase final, per sortéu, Castilla-La Mancha y Aragón.

Contador Estadistiques