La selección asturiana elimina a Bohemia

La Selección Asturiana de futbolistes non-profesionales metiose por primer vegada na historia na fase final de la Copa d'Europa de Rexones de la UEFA. En partíu de vuelta que se xugó ayeri nel estadiu lluanquín de Miramar, l'equipu qu'entrena Baragaño repitió'l resultáu de la ida (1-0) contra l'equipu de Bohemia Central, dexando'l marcador final de la eliminatoria nun 2-0 históricu que mete al nuestru equipu ente los ocho escoyíos de la fase final que va xugase n'Alemaña'l mes qu'entra. Ellí los de Baragaño van enfrentase a les selecciones del Ticino (Suiza), Geyazan (Azerbayán), Ligue du Maine (Francia), Azabolcs Gabona (Hungría), North District (Holanda), Wüttemberg (Alemaña) y Piamonte (Italia).

La selección asturiana salió al campu a guardar el gol de la ida, mientres que los checos ficieron lo que se contaba d'ellos y entraron al trapu namás entrar al campu, pero Morán consiguió marcar el gol que-yos ponía la eliminatoria imposible a los bohemios, que tampoco nun se dieron y tuvieron espetando balones nel área asturiana tol partíu, mientres que los de casa tuvieron delles ocasiones xugando a la contra.