La rede recupera l'Atles Llingüísticu peninsular

Cuando nos años trenta'l filólogu Ramón Menéndez Pidal entamó la obra del Atles Llingüísticu de la Península Ibérica, los investigadortes nun podíen suponer que la Guerra Civil diba obliga-yos a dexar el llabor cuando yá lo teníen cásique terminao. Tomás Navarro, socesor de Menéndez Pidal y director del proyectu nesi momentu, viose obligáu a dir pal esiliu, llevando con elli tolos cuestionarios que se llevaben fechos. Asina l'atles quedó pa prau hasta 1.947, añu en que Menéndez Pidal echa a andar otra vuelta l'equipu d'encuestadores, que consiguen rematar el proyectu orixinal en 1.954. La cosa parez que va recibir l'emburrión definitivu en 1951, cuando los materiales que guardare Navarro nel esiliu americanu vuelven pa la península gracies a un alcuerdu col Centru Superior d'Investigaciones Científiques, pero l'enfotu acaba otra vegada en decepción. Anque llegó a espublizase un primer volume de fonética nel añu 1.962 (Atlas Lingüístico de la Península Ibérica, Madrid: C.S.I.C. 1962, tomo I, Fonética) tres d'esta primer entrega, el proyectu del Atles quedó pa prau, nun se sabe mui bien como nin por qué, y pa más aquello, el cuerpu de cartafueyos coles encuestes orixinales espardiose entós en milenta cachos que quedaron en manes de particulares, biblioteques y archivos de toa triba.Ello ye qu'ente los más de 500 llugares onde se fizo llabor de campu hai, por supuesto, pueblos asturianos, resultando los cartafueyos asturianos del ALPI una ferramienta interesantísima pa la investigación filolóxica astur. Depués de trenta años naide s'alcordaba yá más d'ello, pero gracies al llabor de David Heap, un profesor candiense de la facultá de Filoloxía de la Universidá d'Ontario-Oeste, parez que l'ALPI va resucitar definitivamente na rede. Va tiempu Heap abrió una páxina web personal onde cuenta con dir poniendo tolos cuestionarios orixinales del Atles. Cada cuestionariu consta de 30 páxines que nel web tan escaneaes del orixinal, tal cual les escribió l'encuestador cola so lletra, pero ello ye que, dende qu'entamó con ello, David Heap namás punxo ún cuestionariu na rede, el que correspuende al pueblu madrileñu de Cadalso de Los Vidrios. Puestos en contactu col profesor Heap, esti esplicó que'l proyectu ALPI ta pendiente de recibir financiación que permita pagar al grupu d'espertos que van facer falta pa verter tolos cuestionarios a la rede y facer del web una ferramienta de consulta amañosa y bien iguada, pero'l profesor ye optimista en cuantes que lo que primero yera una páxina personal ta allugada d'apocayá nos servidores de la universidá d'Ontario, anque nun s'atreve entovía a decir pa cuando podría rematase'l proyectu.