La propiedá del Sporting pasa a manes mexicanes

Orlegi Sports, dueñu del Santos Laguna y l'Atlas, faise col control de la entidá llueu de la venta del paquete aicionarial de la familia Fernández y Alejandro Irarragorri ocupa la presidencia.

El 28 de xunu del 2022 queda rexistrada como una fecha clave na historia del Sporting, como lo foi'l pasu a Sociedá Anónima Deportiva (SAD) nestes feches del 1992. 30 años depués de que los socios perdieran el control del club, ésti dexa de tener propiedá asturiana pa pasar a manes mexicanes.

Nun se llibra la entidá xixonesa d'una tendencia cada vez más habitual nel fútbol profesional. La nota positiva del alcuerdu ente Orlegi Sport y Javier Fernández, que se cifra nuna cantidá cercana a los 40 millones d'euros, son los ésitos qu'acumula'l grupu inversor mexicanu nos sos proyeutos deportivos, faciendo campeón tanto al Santos Laguna como al Atlas.

La estructura nueva del Sporting va tar presidida por Irarragorri, con Alfonso Villalva y Martin Hollaender como conseyeros. El secretariu va ser José María Segovia.

Na semeya, imaxe cola qu'Orlegi Sports daba anuncia del alcuerdu pa mercar al Sporting.