La Pola L.lena, ensin filos

La villa de La Pola L.lena vivió
esta selmana una esperiencia bien interesante na democratización del
accesu a la rede internet. La xente del colectivu Asturias Wireless, en
collaboración con otros grupos de defensores d'esta tecnoloxía y
l'Ayuntamientu de L.lena
instalaron esti
fin de selmana una rede pública d'accesu a internet ensin filos
aprovechando la conexón del Ayuntamientu, que dexó la
conexón propia y apurrió los medios técnicos que se
precisaron.



Una antena y un equipu emisor mangaos nel teyáu de la Casa
Conceyu y una rede de repetidores nos llugares más afayadizos (ente
ellos ún nel cementeriu) dieron accesu llibre a internet (y de baldre) a
cualquier ordenador que tuviere una tarxeta pa enchufase a la rede ensin filos.
Estes tarxetes y toa esta tecnoloxía ñacieron de mano pa poder
conectar redes locales n'oficines ensin falta d'estrar el suelu de cables, pero
pronto se vio que'l sistema daba pa muncho más, y que podíen
facese comunidaes d'usuarios compartiendo un solu accesu o dellos distintos
dientro d'una casa de vecinos, un barriu o d'un pueblu.



Estes comunidaes d'usuarios tienen la ventaya adicional de que
s'aprovecha tol anchu de rede, colo que s'amorticen meyor los gastos, ello
ensin quitá-y banda a nengún usuariu. Asina, nel casu d'una
comunidá d'usuarios con accesos de distintes velocidaes,caún
tendría l'anchu de banda que tuviere contratáu más lo que
los demás nun tovieren emplegando nesi intre.



Les redes ensin filos entovía nun se conocen muncho per
equí, pero en bien de campus universitarios y aeropuertos yá tan
implantándose estos noyos d'accesu ensin cables, que puen convertise
amás nuna solución pa pueblos y llugares onde ye dificil que
vayan llegar -nin pronto nin tarde- les redes de cable o los noyos d'Adsl. Una
sola conexón icontratada col Conceyu, el Telecentru local o cualquier
otra entidá podría dar accesu dende casa a tolos vecinos que
quixeren apuntase al serviciu.



Sicasí, hai axentes que nun tan al favor de qu'estes esperiencies
se xeneralicen. Ello ye que la Comisión del Mercáu de les
Tecnoloxíes echó p'atrás va bien poco una interesante
esperiencia en Cataluña, onde' consorciu Localret, formáu por
dellos conceyos, quería echar a andar una rede de conexones Wi-Fi
que-yos diere accesu de baldre a internet a los ciudadanos. La CMT
respondió-yos a los conceyos catalanes que pa dar el serviciu tienen de
tener primero títulos habilitantes y cobrar pol serviciu a precios de
mercáu, porque d'otra manera ello diba suponer face-yos
"competencia illegal" a les empreses de telefonía que cobren
por esos mesmos servicios. Ello tranca de momentu la podibilidá de les
redes públiques, anque la CMT entovía nun se marcó na
cuestión de les redes ente usuarios particulares. La rempuesta entera de
la CMT al consorciu Localret pue lleese
entera nesti artículu.