La Oficina de la Llingua de Xixón presentó al conseyu asesor

La Oficina Municipal de la Llingua de Xixón presentó ayeri'l que va ser d'agora en p'alantre'l conseyu asesor de la entidá. La responsable de la oficina, María Xosé Rodríguez, aprovechó la ocasión tamién pa esponer los proyectos más inmediatos nos que trabaya la entidá.


La Casa de Nava acoyó ayeri la primer xunta de trabayu del Conseyu Asesor de la Oficina Municipal de la Llingua de Xixón. María Xosé Rodríguez, responsable de la oficina, presentó al conseyu asesor como'l preséu pa que toles organizaciones sociales y culturales más comprometíes cola defensa del asturianu puedan tener una representación nel organismu municipal y collaborar activamente na so xestión. Na nómina de persones que faen esti conseyu asesor ta la conceyala d'Educación Carmen Rúa, Urbano Rodríguez pola Academia de la Llingua Asturiana, Roberto Colunga en calidá de representante de la Xunta Rectora de la Fundación Municipal de Cultura y Adolfo Saro pol Conseyu de Mocedá de Xixón. Xunta estos organismos y entidaes de calter oficial el conseyu asesor enxerta tamién a los sindicatos d'educación FETE-UXT, representáu por Maxi Rodríguez y SUATEA, que sienta nesti conseyu a Berto Cobreros. La riestra d'organizaciones y colectivos con voz y votu nel conseyu complétase cola presencia de Pablo Rodríguez pola Xunta Pola Defensa de la Llingua, Jorge Flórez en representación del pequeñu comerciu de Xixón, Periodistes pol Asturianu con Pablo Antón Marín Estrada, Gloria García pola Tertulia Cultural "El Garrapiellu" y Anxel Nava pol Foru Arte Ciudá.


La rueda de prensa presentábase col interés añadíu de ver en que quedaba la promesa de la conceyala d'educación de cultura Carmen Rúa de falar n'asturianu nos plenos, que de momentu nun cumplió. La edil d'IX atayó la entruga primero de que-y la ficieren, y reclamó que se-yos diere un cursu d'asturianu a los conceyales pa poder espresase con propiedá. Rúa comprometióse a llevar a 14 conceyales, incluyendo a l'alcaldesa, a esi cursu.


Dempués de la presentación de los asesores, la encargada de la oficina espunxo los proyectos más importantes en política llingüística pendientes pa esti 2.004 en Xixón. María Xosé Rodríguez sorrayó la cantidá de xente que llama a la oficina pa interesase por cursos d'asturianu y por posibles ayudes pa retular negocios n'asturianu y esplicó qu'esti añu va presentase'l reglamentu y ordenances d'usu del asturianu y van organizase unes xornaes sobre normalización en conceyos. La preparación de la próxima selmana de les lletres, que va dedicáse-y a Andrés Solar ta consumiendo agora munchos de los recursos d'una oficina a la qu'entovía nun s'incorporó l'auxiliar alministrativu que tien prometíu dende va trés meses y que tien pensao contratar un becariu, anque esti puestu depende de les convocatories de la Fundación Municipal de Cultura.