La oficina de la Llingua de Xixón estrena sé

L'Alcaldesa de Xixón, Paz
Fernández Felgueroso y la Conceyala d'Educación Carmen Rúa
asistieron ayeri al actu de presentación oficial de la Oficina de la
Llingua de Xixón, que funciona dende'l mes de setiembre nuna sé provisional nel edificiu de l'antigua
Pesacadería Municipal y que dende ayeri tien yá un local propiu y
unes señes definitives na Casa de Nava.



La responsable de la oficina María Xosé Rodríguez,
esplicó que d'agora en p'alantre va facer un trabayu tresversal,
intentando normalizar l'idioma en toles estayes de la vida del conceyu, y
agradeció-yos a toles persones y instituciones qu'asistieron a la
presentación, citando, ente otres a persones como Chema Vega, Lluis Portal, Xicu Yepes. Y ye que l'actu d'ayeri aconceyó a una gran
representación asturianista y de cargos públicos, incluyendo a
los responsables de los servicios de normalización de L.lena y
Llangréu, el conceyal de cultura d'Avilés y dellos ediles del
conceyu de Xixón, amás de representantes de la Xunta Pola Defensa de la Llingua o la
Fundación Caveda y Nava. Ente los presentes taba tamién el nuevu
Director de Política Llingüística del Principáu,
Ramón d'Andrés, al que l'alcaldesa convidó a xubir al
estráu. D'Andrés emponderó la importancia de que se ponga
una oficina d'estes característiques en Xixón, la ciudá en
que más falantes d'asturianu hai.



La Conceyala d'Educación Carmen Rúa, que presentó
l'actu n'asturianu, fizo referencia espresa a la oficialidá como un
oxetivu al que nun renunciaba y reconoció que'l pautu de gobiernu
municipal abultába-y curtiu, anque esplicó qu'esta
oficialidá va tener que llegar tres d'un procesu progresivu. La
única que faló en castellanu nel actu foi l'alcaldesa de
Xixón, Paz Felgueroso, que s'escusó por nun tener soltura nel
idioma de Marirreguera y dixo que, anque la iniciativa de facer el serviciu nun
vieno del grupu políticu qu'ella representa, tol gobiernu municipal
celebraba la so creación.



Depués de trés meses funcionando provisionalmente, la
oficina yá tien una sé estable y un presupuestu qu'anda alredor
de 20 millones de les antigües pesetes, ello ensin contar gastos de personal. A falta de páxina web propia, que va tener d'equí
a dientro poco, la oficina tien les sos señes na Casa de Nava, Cai
Salamanca 1 de Xixón. El teléfonu ye'l 985 18 13 89 y la
dirección de correu electrónicu ye llinguaasturiana@ayto-gijon.es.