“La Noite Celta ye especial pola xente y los músicos, que quieren venir”, asegura Pepe del Polo

El que tuviera en dalguna ocasión na alameda de Porcía na Noite Celta sabe que ye dalgo diferente. “Ye especial pola xente y los músicos, que quieren venir y faen un esfuerciu”, destaca Pepe del Polo sobre esta folixa que celebra la so trentena quinta edición.

L’entornu, casi máxicu, ayuda, pero tamién la organización, les sardines tán riques que se preparen y l’altu nivel de los grupos que pasen pel escenariu. Un exemplu ye’l cartelu d’esti añu, cola presencia de “Tejedor, con un direuto de sobra conocíu; los escoceses Dallahan, de los que sabemos que tienen bastante calidá; y N’Arba, grupu formáu por músicos que toquen en delles formaciones y que se xunten de xemes en cuando nesta banda que tantes ganes hai de ver”.

Xunto a ellos, la Noite Celta da tamién espaciu a formaciones del occidente, como Cádaba, Caldo y Os Rabizos, y el gaiteru Nela de Bres, que van tocar mientres una hora y cuartu temes propios y de manera conxuntu. La bandina La Garrapiella va encargase d’abrir los conciertos mañana a les 22 hores y d’animar l’ambiente ente grupu y grupu.

“La Noite Celta ye especial pola xente y los músicos, que quieren venir y faen un esfuerciu pa ello. Si nun lo fixeran sería difícil sacar esto p’alantre”, esplica Pepe del Polo, al frente de la decana de les nueches celtes del país dende la primer edición, entamada’l 1984. Asina recuera que “persones de toda Asturies, y dalgunos de Galicia, avérense a Porcía tolos años”, creando un clima mui especial alredor de la música folk.

Na alamenda yá too preparao pa una edición nueva de la folixa, tamién les sardines que se van preparar mañana pa que los presentes garren fuercies a cambio de la voluntá. “Encargamos ente 120 y 130 quilos”, señala’l presidente de l’Asociación Cultural Alameda, al tiempu que convida a tolos aficionaos a averase hasta’l conceyu d’El Franco pa disfrutar de la Noite Celta.

Na semeya, el chigre yá instaláu de la Noite Celta.