La negociación IX-PSOE, a Conceyu Abiertu

Pal mes qu'entra, la Xunta Xeneral del Principáu va tener que tar constituyía. Hasta primeros de xunetu tienen los partíos políticos con representación p'apautar un alcuerdu que dea gobernabilidá al Principáu nesta llexislatura. La mayoría relativa del PSOE con 22 escaños apunta a un pautu de gobiernu con Izquierda Xunida que cada vegada parez más inevitable, y el mundu asturianista vive estes selmanes de negociación ente la dulda y la esperanza de lo qu'esta llexislatura pueda aportar a la normalización y dignificación de la llingua asturiana, que ye ún de los puntos fuertes de la negociación ente dambos partíos. Con too y con ello, prestaríanos n'Asturies.com facer un Conceyu Abiertu en que tomá-y el pulsu al enfotu de los nuestros llectores sobre esti particular ¿qué te parez que va sacase en claro de les negociaciones PSOE-IX sobre l'asturianu?