La neciura del galipote

Como yá esplicáremos va pocos díes, la llegada de galipote del Prestige a la costa asturiana acelerose a lo llargo de la segunda y tercer selmanes de xunetu, en que se retiró de la mar más fuel que en tol mes de xunu y la primer selmana de xunetu. La neciura de la marea prieto llevó ayeri a la retirada de toles banderes azules de les playes del cantábricu por culpa de la llegada masiva del galipote que ta entafarrando la temporada de baños.



Anque tolos mensaxes oficiales faen llamaos a la calma, quedando pa la galería declaraciones como la del conselleiro de Pesca e Asuntos Marítimos de Galicia Enrique López Veiga, cuando dixo que'l fuel que sal del Prestige comíalo y desfacíalo la mar, y polo tanto nun llegaba a les playes, la comisión especial de seguimientu del Prestige decidió poner más medios de llimpieza énte la resurrección de la marea priero, esta vegada en forma de 13 lanches nueves de la Cruz Encarnada que, por ser más pequeñes, puen allegase más a les playes y pedreros pa retirar les manches flotantes tirando de trueles y de paxos. D'esta partida de lanches nueves, les cuatro que-y toquen a Asturies van mandase pa destinos bien turísticos, como son la playa de San Llorienzo de Xixón, Salinas en Castrillón, y Toró y El Sablon en Llanes.

Anguaño, l'equipu de barcos que ta retirando'l galipote faenlu les tres lanches
"Salvamar" Rigel, Algol y Capella de la Sociedá Estatal de
Salvamentu Marítimu xunta les lanches La Figar (Xunta del Puertu de
Xixón), y barcos de la Cruz Encarnada de Xixón, Tapia, L.luarca,
Avilés y Llastres, mientres qu'el remolcador Alonso de Chaves coordina
los trabayos de los demás barcos y fai llabores de control. Aparte
d'estos barcos d'organismos oficiales, hai nel llabor pesqueros contrataos de
Lluanco, Candás, L.luarca, A Veiga y As Figueiras, cofradíes coles que Fomentu y Sasemar tienen contratos especiales.

Una de les entrugues que se planteguen énte esti panorama ye saber cuantu galipote queda na mar. La única entidá en dar una rempuesta foi la fundación vasca AZTI, qu'espublizó nun informe a últimos de xunu delles estimaciones que poníen la cantidá de galipote suelto pel cantábricu cerca de les 5.000 tonelaes.