La música del 2003, n'Asturies.com

Güei vamos facer un pequeñu repás a lo que dexó'l 2003 no que cinca a la música asturiana.

Esta ye un tiempu en que ye vezu facer balance de como foi l'añu, y dende Asturies.com vamos facer un estoyu cola música del añu. Lo más interesante, mirando en perspectiva ye ver si la música asturiana y la so industria tan nuna llinia ascendente o descendente. Una güeyada rápida llévanos a pensar que poques coses camudaron nesti 2003, el circuitu de conciertos na escena folk sigui centráu nes nueches folk del branu entamaes por asociaciones y dellos conceyos. El rock, pop y los demás estilos tamién tienen falta d'unes sales de conciertos qu'igüen espacios onde tocar, y asina crear una cultura de conciertos ente'l públicu como opción d'ociu. No que cinca a discos tenemos delles aportaciones interesantes, ensin dulda ún de los más aplaudíos del añu nel folk foi "Yá!" de "Felpeyu", gran producción y bon trabayu instrumental y de voces fai qu'esti seya ún de los discos del añu. Tamién "Llunáticos" de "Tejedor" ta por méritos propios nun puestu destacáu de la collecha del añu. "Gatos del Fornu", "Guti", "La Raitana", "Xuacu Amieva" o "La Reina'l Truebano", "Manta Ray" o "Nacho Vegas" son exemplos de bandes y artistes qu'esti añu sacaron a la cai trabayu discográficu, lo qu'amuesa un cierta salú de les discográfiques, anque nos más de los casos conozse qu'entovía hai muncha dependencia de la dinámica que condicionen les subvenciones.

Esti tamién foi l'añu d'Asturies nel Festival Intercélticu de Lorient, onde Asturies.com tuvo contando día tres día l'actividá . Les bones actuaciones de los grupos asturianos y los segundos puestos nel Macallan y nel campeonatu de secciones de percusión de bandes de gaites foron les notes destacaes, mientres que la falta d'un sofitu institucional fuerte a la delegación asturiana y el calor qu'afogaba foron les negatives. Polo que se vio en Bretaña, quedó claro qu'Asturies tien una cierta capacidá pa responder con dignidá énte eventos d'esti tipu, anque dende'l Principáu nun se crea muncho nello.

Hai que destacar la creación por parte de l'Academia de la Música de la categoría de "Meyor Cantar n'asturianu" dientro de los Premios de la Música que concede esti organismu vinculáu a la SGAE. Esti premiu, que llega dempués de muncho miagar por ello, supón un pequeñu reconocimientu a una realidá musical asturiana que venía dende va muncho pidiendo esti premiu. Recordar que dende Asturies.com tamién tamos escoyendo cual ye'l meyor cantar n'asturianu al traviés d'esti concursu.

Munchos son los aspectos que nun tocamos nesti resume, pero la sensación xeneral que queda depués de facer una pequeña reflexón ye que más o menos tamos como entamamos. La principal culpa ye de la insistente falta d'una política cultural dende'l gobiernu, que lleva a que tolos esfuerzos privaos tengan qu'enfrentáse de xemes en cuando a torgues que nun puen valtase, y que guapamente podríen dexase atrás con un pequeñu sofitu dende les instituciones responsables. L'actual composición del gobiernu pue facenos pensar qu'entame a crease esa definición de política cultural pa cola música asturiana, anque a primeros de 2004 tovía tamos esperando por ella.

Nun queremos acabar esti repás ensin facer alcordanza d'una persona que nos dexó esti añu. Ye'l gaiteru Jairo García, a quien el qu'esto qu'escribe conoció en persona nel festival Intercélticu de Lorient. De forma personal y dende too Asturies.com queremos facer alcordanza d'esti gaiteru que la carretera nos quitó esti añu.