La moda del galipote

Cola llegada del veranu, el galipote asomó otra vuelta pela costa del país, obligando a reforzar los equipos de llimpieza en toles playes y pedreros. Mientres la empresa pública Tragsa, que ye la que ta llevando dende qu'entamó l'asuntu la contratación de personal pa llimpiar el galipote, fizo estes selmanes otra campaña de captación de xente, los datos oficiales falen de la cantidá d'obreros trabayando y de los equipos de seguranza y monos blancos que van repartiéndose, mientres el Ministeriu presume de la cantidá de metros cuadraos de pedreru que va llimpiando coles criticaes máquines d'agua a presión.

Sicasí, nun parez que tol esfuerzu tea yendo en llimpiar. Cada vegada son más los testimonios d'obreros de les brigaes de llimpieza que nun entienden pa que val lo que tan faciendo. Y ello nun ye porque en retirando'l galipote vuelva la marea a posar otro nuevo, sinon porque, al dicir de bien d'ellos, namás que tan ehí pa dar paseos, y non pa trabayar. Ye'l casu d'un trabayador d'una de les brigaes col que pudo contactar Asturies.com que diz que vio que, en cuenta de mandalu a llimpiar onde más falta facía, los xefes tuviéronlu tol día paseando en funda blanca pela playa de Salinas, que nun tenía una pinta demasiao puerca pero que sí que taba estrada de turistes. En decatándose qu'esta práctica yera normal y hasta sistemática, esta persona decidió abandonar el puestu y dase de baxa, solución radical que nun ye nin con muncho xeneralizada pero que sí que fala de la moral d'unos equipos de trabayu que comenten muncho esta situación.