La mocedá asturiano nun pon casa

La mocedá d'Asturies presenta los índices más pequeños del estáu d'emancipación de la casa de los padres, representando la vivienda mozo, esto ye, lo que ta ocupao de xente de 35 años p'abaxo, namás el 7,5% del total. Esti datu, qu'apurre l'observatoriu de vivienda mozo del Conseyu de la Mocedá d'España, nun ye mui nuevu, pero l'observatoriu del CME alvierte de que la tendencia ye que cada vez menos xente mozo s'emancipe de casa de los padres.

L'observatoriu de vicienda del CME ta acabante d'espublizar los datos del tercer trimestres del 2.003 referentes a vivienda y mocedá nel estáu. La parte del informe refería a Asturies rescampla que la tasa d'emancipación, que da'l numberu de mozos y moces que viven fuera de casa de los padres, baxó enforma nesti trimestre, pero atribúi la causa d'esta situación al mercáu llaboral en cuenta del mercáu de la vivienda. De fechu, el CME reconoz que les condiciones d'accesu a la vivienda pa xente mozo n'Asturies, con ser dures, meyoraron sobre estudios anteriores, dexando los índices d'accesibilidá a la vivienda nel 31% pa los que marchen a vivir xuntos y nel 42,3% pa los que van solos. Respective a esti índiz d'accesu a la vivienda, hai que dicir que presenta desigualdaes bultables per estayes d'edá y per sexos. Asina, la estaya d'edá ente los 18-24 años carez una tasa d'accesu mayor, teniendo qu'invertir más del 60% de los sos ingresos pa poder metese nuna casa, mientres que la estaya ente 30-35 años namás precisa d'invertir el 36% de lo que gana. Ente homes y muyeres la desigualdá ye enorme, y asina mientres ellos invierten na vivienda'l 40% de lossos ingresos, elles tienen que poner cerca del 50%.

Ente les causes de la baxa tasa d'emancipación el CME identifica la tasa alta de paru, la baxa ocupación llaboral y la baxa tasa de contratos estables, pero tamién apunta como factor que pue distorsionar los datos el fechu de qu'Asturies seya la comunidá autónoma col mayor tantu por cientu de población mozo estudiando, col 22,4%.