La mina na lliteratura

"Literatura y minas en la España de los siglos XIX y XX" ye la obra del caderalgu de lliteratura Benigno Delmiro Coto que ta acabante d'editar la Fundación Juan Muñiz Zapico cola collaboración d'una riestra d'instituciones asturianes. Esti volume, qu'estudia como la lliteratura espeyó'l fenómenu de la minería, ye una ferramienta mui afechisca pa conocer, dende una perspectiva crítica, les visiones d'escritores d'equí y de fuera sobre una industria que foi'l motor de la economía asturiana a lo llargo de décades y que guañó una imaxe arquetípica d'Asturies.

El volume entama con una referencia al escritor Xulio Verne como autor nel que s'atopa l'aniciu de la lliteratura minera pa metese dempués a estudiar les característiques de la novela minera por definición, el famosu Germinal d'Emile Zola. Esti primer capítulu lleva tamién al autor hasta América del Sur, au se sigue la güelga d'esta lliteratura nel continente americanu. El segundu capítulu fai analís de los tópicos que s'atribuyen al mundu de la mina, dende la visión terrible que tienen Pérez Galdós, Clarín, Palacio Valdés y Pérez de Ayala hasta la comprensiva de Vicente Blasco Ibáñez o del poeta Miguel Hernández.

El tercer episodiu céntrase nel periodu1907-1936, nel que l'autor asitia l'ascensu a la categoría de protagonista del mineru. Esta ye la época en que'l políticu asturianu Isidoro Acevedo escribe "Los topos, la novela de la mina" obra del añu 1.930 que denuncia la miseria del obreru contrastándola colos privilexos del patrón col envís d'esconsoñar la emotividá del llector, mientres que'l cuartu episodiu enraigona dafechu n'Asturies p'analizar l'espeyu lliterariu de la revolucíon d'ochobre, nel que rescampla l'esistencialista francés Albert Camus, que-y dedicó una obra de teatru al 34 asturianu.

El llibru remata faciendo un repasu de les obres lliteraries que recurren a la mina d'una manera o otra, na dómina del franquismu, na qu'alcontramos la obra del uvieín José Luis Martín Vigil, con obres como "Sexta planta" y hasta l'añu 1.985. Darréu d'ello, un capítulu final trata la lliteratura minero d'estos venti años últimos.

Los promotores d'esti interesante llibru tan faciendo un ciclu de presentaciones per toa Asturies que llega esti vienres a les 20:00h al Teatru Conde Toreno de Cangas del Narcea.