La manifestación xunitaria pol 25-P, en La Pola Siero pa llegar a toles muyeres d'Asturies

Asturies Feminista 8M movilízase un añu más esti día con motivu del Día Internacional de Desaniciu de la Violencia contra la Muyer.

El 25 de payares vien entamándose dende'l 1981, xornada que recuerda l'asesinatu de trés hermanes, les Mirabal, activistes polítiques, en República Dominicana nel 1960 pol réxime de Trujillo. Una fecha que sirve pa rescamplar esti grave problema y pa concienciar a la sociedá sobre'l mesmu.

El Día Internacional de Desaniciu de la Violencia contra la Muyer convirtióse n'Asturies nos años últimos nuna xornada de reivindicación y xuntanza. Son importantes les manifestaciones entamaes esti tiempu y la de mañana, convocada baxo'l lema qu'amiesta'l castellanu y l'asturianu '#SeAcabó. Xusticia. Verdá. Non al silenciu patriarcal', nun va quedar atrás.

Decenes d'autocares tán programaos a La Pola Siero dende diferentes conceyos, como Xixón, Mieres, Grau, Corvera o Avilés, amás de dellos putos del de Siero, pa favorecer la participación, fomentando asina'l llevar la movilización a diferentes puntos d'Asturies pa llegar a toles muyeres del país. La salida va ser al meudía del Mercáu del Ganáu pa recorrer el trayeutu esistente hasta Les Campes.