La LOCE quier entrar n'Asturies

El xueves 5 de febreru, el Conseyu Escolar del Principáu dio de pasu, con dellos remociques, los cuatro proyectos de decretu que la Conseyería d'Educación presentare con calter d'urxencia p'aplicar n'Asturies los mandaos de la Llei de Calidá de la Enseñanza. Con namás trés votos en contra nel Conseyu Escolar, los cuatro decretos tan agora pendientes de que los aprebe'l Conseyu de Gobiernu del Principáu,pel que tuvieron a puntu de pasar ayeri, anque a la fin l'asuntu quedó aplazáu tres de les xestiones de SUATEA p'atayar el tema. El sindicatu d'enseñanza más críticu cola Llei de Calidá aconceyó colos trés partíos que tan en gobiernu asturianu pa esplica-yos que diben aprebar unos decretos que taben en contra dafechu de los sos propios principios ideolóxicos y del mesmu pautu de gobiernu pol que se manda la coalición en gobiernu. Según el sindicatu d'enseñanza, qu'esta selmana llegó a acusar al Gobiernu asturianu de "desbordar pela drecha" al gobiernu del Partíu Popular, los cuatro decretos suponen un ataque a la escuela pública, que los partíos en gobiernu dicen defender penriba de la concertada.

El primeru d'estos decretos ye l'entituláu "Decretu d'almisión d'alumnáu" . Esti documentu ye'l que centra les más de les crítiques de la organización sindical. En pallabres de la representante de Suatea esti documentu da-y valir llegal al conceptu de "centros sosteníos
con fondos públicos" categoría qu'iguala los centros públicos colos particulares a la hora d'escoyer centru, lo que va más p'allá del espíritu de la mesma LOCE, afitando'l supuestu "derechu a la elección de centru" que siempres reclamaron la escuela privada y les entidaes confesionales dedicaes a la educación.


El segundu decretu ye'l nomáu "de designación de directores de centru" qu'al paecer de Suatea xerarquiza la organización de los centros desaniciando de los mesmos les rellaciones democrátiques y los calces de participación de la comunidá educativa, apautando pa nomar a los directores una comisión de selección d'ocho persones de les que 4 van puestes pola alministración, cuando primero de la LOCE la figura del director salía por votación de tola comunidá educativa, participando nel procesu mayestros, padres y alumnos.

El tercer decretu en cuestión ye'l que trata les necesidaes educatives especiales. Nesta estaya, abandónense los programes de Diversificación y Compensatoria y escaezse al alumnáu más desfavorecíu al quitar la obligación de facer llabor de detección, prevención y atención de problemes. D'otra manera, esti decretu preve que les Organizaciones Non Gubernamentales puedan participar nestos llabores d'atención a necesidaes especiales, lo que supón, al paecer del sindicatu, una puerte abierta a la entrada d'empreses particulares na enseñanza pública.

Nel terrén llaboral, el decretu de retribuciones mete tisoria na consulta sindical sobre temes salariales y estudia anular el pagu de los meses de veranu al personal interín que trabayare más de cinco meses y mediu nun cursu.

Pel momentu, el Conseyu de Gobiernu d'ayer aparcó'l tratamientu d'estos decretos, pero'l Movimientu Pola Defensa de la Escuela Pública da anuncia de que nun va permitir que se dean de pasu, anunciando como primer midida de protesta un incierru nel Institutu Xovellanos de Xixón el próximu 10 de febreru y, casu de ser preciso, entamar una convocatoria de fuelga.