“La importancia” del Festival Interceltique de Lorient tuvo presente nel Alderique d’Orientación Política

Adrián Pumares, voceru de Foro, consideró “mui positivo” nel Alderique d’Orientación Política Xeneral qu’Adrián Barbón “diese la importancia al Festival de Lorient que de verdá tien”, a lo que’l presidente respondió afirmando que “toi convencíu de qu’en mui poques en ocasiones en temes internacionales vi que se falara tanto d’Asturies como ellí”. Pela so parte, el diputáu Luis Armando Fernández Bartólome duldó de los raigaños celtes del país.

El diputáu llavianés foi’l primeru n’intervenir pela tarde, protagonizando un completu debate col socialista. Ente les munches opiniones, crítiques y valoraciones intercaló tamién dalgún reconocimientu, rescamplando’l que fixo referencia al Festival Interceltique de Lorient.

“Considero mui positivo qu’a diferencia de los sos predecesores diese la importancia al Festival de Lorient que de verdá tien”, recordando darréu la defensa de la vistimente escoyida por Barbón pa la receición oficial del alcalde d’An Oriant, Fabrice Loher, con capa d’honor y montera picona, “crítiques o burlles que nun foron a vusté, sinón que creo que foron a tolos asturianos”. Al empar, aprovechó pa valorar “qu’en Xixón se cancelase’l Festival Arcu Atlánticu”, creáu por Foro en Xixón con Carlos Rubiera como conceyal de Cultura, “que creo que yera mui importante y esti añu”, coincidiendo con que’l certame bretón tuviera dedicáu a Asturies, “precisamente podría ser especialmente importante”.

Barbón agradeció’l posicionamientu de Pumares aquellos díes y avisó de que, na so opinión, “n’Asturies ta abriéndose una vía mui estremista, mui antiasturiana, mui radicalizada, que se burlla por exemplu de que’l presidente d’Asturies nun festival intercélticu ponga’l paxellu d’honor, la capa d’honor y la montera picona. Llamento muncho molestar al que se burlla d’ellos, pero yo creo que ye un elementu fundamental”,

D’igual forna apuntó que “nun nos imaxinamos l’impautu que dende’l puntu de vista turísticu tien esti festival. Yo nunca tuviera na mio vida, tuvi esta vegada, y toi convencíu de qu’en mui poques en ocasiones en temes internacionales vi que se falara tanto d’Asturies como naquella ocasión”. Tornó a agradecer “que nesto tenga un fondu arguyu, porque ún de lo males de la nuestra comunidá autonóma ye un problema d’autoestima, de creer más en nós mesmos, de reivindicar la nuestra historia, de creenos lo que somos, de llevar con arguyu que somos asturianos”.

Les duldes de Fernández Bartolomé

El diputáu del grupu mestu, ex de Ciudadanos, Fernández Bartolomé aprovechó unos segundos de la so intervención pa tocar el tema del certame bretón. “Hai una cosa que nun me gustó”, apuntó a Barbón, “creo que’l Festival de Lorient ye mui importante, pero les alusiones al pueblu celta... La presencia de los celtes n’Asturies… Tengo que dici-ylo… Vusté pue dir ellí y dicir lo que quiera y paezme fenomenal, pero creo que distorsiona un poca d’ónde venimos y ónde queremos dir, y dende llueu’l nuestru destín ye España y ye Europa, colos que compartimos una estraordinaria historia en común”.

Na semeya, Pumares intervién con Barbón atentu nel bancu.