La importancia de Cuadonga na historia del país analízase nunes xornaes científiques

Espertos en delles disciplines van afondar nesti aspeutu en Villanueva dende'l puntu de vista cultural, identitariu y turísticu.

La Conseyería de Cultura, Política Llingüística y Turismu y la Universidá d'Uviéu entamen mañana y el vienres les xornaes científiques de difusión humanística 'Caminos hacia la altura. Covadonga y el Camín de los Santuarios' dientro del programa Cuadonga 2022 pol 1.300 aniversariu de la batalla. Organizaes pola Direición Xeneral de Cultura y Patrimoniu y el Vicerrectoráu d'Estensión Universitaria y Proyeición Cultural, cuenta cola coordinación de María Sanhuesa, profesora del departamentu d'Historia de Arte y Musicoloxía.

El primer bloque del programa va contar coles conferencies 'Covadonga y la identidad histórica del Reino de Asturias' (9.30 hores), a cargu de María Álvarez Fernández, y 'Covadonga en la Alta Edad Media' (10.15 hores), por Margarita Fernández Mier, pa siguir con 'Covadonga: cultura y turismo para un desarrollo sostenible' (11.30 hores), d’Eduardo del Valle Tuero, y 'El proyecto Via Carlomagno' (12.15 hores), con Xosé Alba. Va finar la mañana con un alderique con tolos ponentes.

El vienres l'actividá nel Parador de Cangues d'Onís va abrila Juan Carlos de la Madrid con 'La importancia de Covadonga en los inicios del turismo en Asturias' (9.30 hores), pa siguir Juan Sevilla y Daniel Herrera con 'Covadonga: la configuración de un paisaje cultural' (10.15 hores) y María Sanhuesa 'Covadonga, imágenes sonoras' (11 hores). El bloque últimu va contar coles conferencies 'El Camino Lebaniego y el Camino Asturiano: recorridos e itinerarios desde Santo Toribio hacia Covadonga' (12.15 hores), a cargu de Carmen Gil de Arriba, y 'Los itinerarios culturales europeos y lo religioso: patrimonio cultural compartido y vivo' (13 hores), con Noelia Fernández, pa finar con un alderique nuevu.

D'esta forma, les xornaes divídense en dos partes: una primera que se trata nos primeros momentos del día sobre l'espaciu de Cuadonga, los sos tiempos y la so memoria, y una segunda centrada na so conexón colos itinerarios culturales estatales y europeos, repasando'l so venceyu col Camín de los Santuarios, el Camín de Santiagu, el Camín Llebaniegu o'l proyeutu de Vía Carlomagno.