La Guerra emburria´l Ibex penriba los 6.000

L´entamu de l'ataque a Irak acabó con toles duldes, y los inversores continuaron col "rally" qu'entamaren la selmana pasada al mesmu tiempu que los tanques norteamericanos diben metiéndose per tarrén iraquino. Agora les espectatives de los inversores enfótense nun conflictu que dure poco, mientres les supuestes victories militares d´Estaos Xuníos dan puxu a los índices bursátiles de tol mundiu, ente elles l´Ibex, que peslló la meyor selmana de ganancies d´esti añu 2003. Sicasí el bon comportamientu del Ibex foi munchu peor que´l del restu de les places europees que vieron, por poner un casu, como París medraba'l 3,5%.



Wall Street celebró les victories que dicen tener los militares norteamericanos con una selmana de ganancies hestórica. Según los datos ye la meyor selmana de xuba de va venti años p'acá, asitiándose'l Dow Jones nos 8.521,62 puntos con una medra del 8,4% na selmana tres d'ocho 8 diis de xuba gracies al optimismu de los inversores nel trunfu bélicu. L'índiz tecnolóxicu Nasdaq beneficiose tamién del tirón con un resultáu selmanal d´un 6% más, mangándose nos 1.421,17 puntos. Pa los inversores el control de los pozos de petróleu ta cada vegada más cerca y eso tranquilizalos abondo ya que ye´l oru prieto lo que de verdá importa nesta guerra.

Otramiente, les estadístiques espublizaes na selmana nun dieron pa munches alegríes: l' IPC norteamericanu de febreru xubió'l un 0,6% el doble qu´en xineru del 2.002. Pero les perspectives d´inflación son bones mentantu'l petróleu nun pase de los 27 dólares el barril. Según los espertos la guerra nun va beneficiar a les empreses pero l'aniciu del conflictu quita munches duldes. Los analistes tamién dicen que les bolses podríen siguir col "rally" alcista si nun hai problemes nel desarrollu de la guerra.

L´Ibex ganó un 2,55% más hasta los 6.285 puntos el pasáu vienres, colocándose penriba del encontu de los 6.000. El sector bancariu foi el más tayada sacó: BBVA y SCH subieron penriba´l 5% caún y un poco menos Telefónica, Repsol y Endesa, pero la sorpresa foi Inditex, que con un beneficiu netu de 438,1 millones d´euros decepcionó a los inversores que contaben con más, cayendo la textil el 19,65% hasta los 18,40 euros. La situación na Llatinoamérica y la cayida del dólar taragañaron el réditu de la gallega hasta dexalu nel 29% más.

El bon comportamientu de les bolses estrapayo'l preciu de los bonos, perdiendo l'alemán 0,5 puntos esta selmana. Otramiente los futuros del Brent yá lleven con esta siete selmanes baxando, picando'l 2,5% hasta los 24,85 dólares. Nel mercáu de divises la divisa norteamericana ya val 1,0557 unidaes por euru, y el control americanu de la situación garantizaría precios de 24 dólares el barril. Toos creen nuna victoria contundente d´Estaos Xuníos, pero nun hai guerra ensin sorpreses. Asina que cuanto más rápido se llega arriba, tanto más manca al cayer.