La guerra d’Ucrania, la fuelga de tresportistes y l’acumulación dexen estantes escosaos nes tiendes asturianes

|
Estantes vacíos nun supermercáu d'Asturies

El gobiernu central prometió ayeri ayudes pero tan sumándose más tresportistes a los paros

Continúa la fuelga del sector del tresporte y nesti novenu día yá afeuta a supremercaos, tiendes de ropa, restaurantes y gasolineres, sobre too del sur y este d’España. La falta de suministros nun ye sólo por mor de los paros de los camioneros, hai productos que yá empezaben a faltar cuando entamó la guerra d’Ucrania como l’aceite de xirasol o la farina.

Esto, y la subida de precios fizo que munchos consumidores entamaren a acumular los de primera necesidá. Amás d’aceite y farina, les legumes, los alimentos envasaos en lata, la lleche y derivaos, y dellos artículos d’hixene -n’especial los de marca blanca o preciu baxu- tan escosaos en munchos supermercaos. Les compres n’alimentación subieron un 23%.

Ayeri, tres d’una reunión con representantes del tresporte, el Gobiernu d’España anunció ayudes al sector de cuasi 500 millones d’euros. Pero nun sirvió pa desconvocar les movilizaciones: la falta de concreción fizo que les patronales se sumen a la fuelga. La flota pesquera asturiana ta parada dafechu, y munchos agricultores y ganaderos xúnense a les convocatories.

El sábadu, 400 camiones y 40 tractores circularon per Uviéu y intentaron llegar al Calatrava, onde taba cellebrándose’l Congresu de la Federación Socialista Asturiana. El mesmu día, unos 5000 asturianos participaben n’otra manifestación en Madrid. Tamién güei una comitiva de camiones protestó nel occidente d’Asturies.

N’Avilés, una cadena de gasolineres d’autoserviciu, hubo de zarrar temporalmente hasta poder llenar los tanques de combustible. Los hospitales del norte del país alvierten que tienen les reserves xustes de melecines. Ente les empreses que más tan sofriendo la falta de suministros tan les multinacionales Danone, Heineken, Inditex, McDonals, Amazon, Día y Lidl.

Contador Estadistiques