La gala d'entrega de los Premios Lliterarios repite nel xixonés LLABoral Centru d'Arte

|
Gala entrega Premios Lliterarios 2020

Baxel va poner la nota musical al eventu.

Los siete gallardones de la Conseyería de Cultura, Política Llingüística y Turismu que conformen dende l'añu pasáu los Premios Lliterarios, cola incoporación del de narrativa moza y traducción, y el de teatru van entregase mañana na gala que va tener llugar na nomada sala 'chill-out' de LLABoral Centru d'Arte y Creación Industrial, a les 17.30 hores, cola presencia de la conseyera Berta Piñán y el direutor xeneral de Política Llingüística, Antón García. Ye'l segundu añu en que Xixón acueye esta cita colos meyores creadores del 2021 que participaron nos diferentes concursos convocaos.

Los ganadores nesta edición foron José Ángel Gayol, con 'La cafiante muerte de Nicolai Bostov' (XLII Premiu Xosefa Xovellanos de novela); Pablo Texón, con ‘Cantar de ti mesma’ (XXVII Premiu Xuan María Acebal de poesía); Ramón d'Andrés, con ‘Una ciencia ensin enfotu’ (XXVII Premiu Máximo Fuertes Acevedo d'ensayu); Xilberto Llano, con ‘Boliescritu de primavera’ (XIV Premiu María Josefa Canellada de lliteratura infantil y xuvenil); Ángel de la Calle, con ‘Paez que nun foi ayeri’ (XIII Premiu Alfonso Iglesias de cómic); Blanca Fernández, con ‘No que cinca los seres de lleenda’ (I Premiu Enriqueta González Rubín de narrativa moza); y la Biblia, tornada por un equipu d'una trentena de persones (I Premiu Florina Alías a la meyor traducción). A ellos hai que sumar a Producciones Nun Tris, compañía merecedora del V Premiu y Festival Nel Amaro de Teatru Profesional en Llingua Asturiana o Gallego-asturiano por ‘La reina la guapura de Leenane’.

Xunto cola entrega de la estatua conmemorativa y les pallabres de los premiaos, la gala va contar con una actuación de Baxel. El dúu ribeseyanu, qu'asoleyó recién el so primer trabayu, 'El cantar del Simpatías', va pesllar la cita.

Na semeya, un momentu de la gala del añu pasáu.

Contador Estadistiques