La FSA astiénse na votación de la PNL contra los espectáculos taurinos, refugada na Xunta Xeneral

La PNL presentada por Podemos y IX contra los espectáculos taurinos refugóse colos votos en contra del PP, Ciudadanos, Foro, VOX y el diputáu Luis Armando Fernández Bartolomé. La FSA-PSOE astúvose alegando qu’esti asuntu, que buscaba encamentar a la derogación la llei estatal que regula la tauromaquia como patrimoniu cultural, debería tratase nel Congresu.

Les dos formaciones d’izquierda llevaron a la Xunta Xeneral esta iniciativa ciudadana que recoyó 51.861 firmes al traviés d’una campaña na plataforma dixital change.org baxo’l lema ‘No a la corrida de toros en Onís. Asturies libre de maltrato animal para siempre’ entamada por Víctor Manuel Iglesias y roblada por Huellas del Sella. La Proposición Non de Llei solicitaba nel primer puntu que’l Parllamentu espresara “la so posición contraria a los espectáculos taurinos en xeneral y al so caltenimientu na nuesa comunidá autónoma en particular al considerar que son una cruel espresión de maltratu animal que nun pue xustificase polos sos disctutibles valores artísticos y culturales”.

Nel segundu proponía l’encamientu al Conseyu de Gobiernu a dirixise al Executivu estatal “pa qu’impulse la derogación de la Llei 18/2013, de 12 de payares, pa la regulación de la tauromaquia como patrimoniu cultural, pa permitir que la nuesa comunidá autónoma pueda llexislar la prohibición d’espectáculos taurinos en tol terrritoriu de la comunidá autonónoma”. Encargóse de defendela Rafael Palacios, de Podemos, qu’aseguró, en castellanu nesta ocasión, que “la sociedá refuga cada vez en mayor midida un divertimentu bárbaru, xabaz y denigrante” y recordó la falta de tradición n’Asturies “onde namái’l dopaxe institucional caltién en pie la tauromaquia”.

Mentes, Ángela Vallina, d’Asturies pela Izquierda (IX-IAS), comparó a los toros cola llucha de gladiadores y citó a Gaspar Melchor de Xovellanos, que “los consideraba un absurdu”. “Los toros son cada vez más residuales n’Asturies, afortunadamente”, apuntó.

Defensa de la llibertá individual

El primer votu en contra confirmáu foi’l de Bartolomé, del grupu mestu, que, anque confesó nun ser aficionáu a la nomada ‘fiesta’, señaló que “esto nun va de toros, sinón del exerciciu de la llibertá” y que “si nun hai raigón, caerán pol so propiu pesu”. Por VOX faló Ignacio Blanco, que calificó de “perda de tiempu” y “atentáu conta la lliberta” la PNL.

“Non a la subvención, pero tampoco non a la prohibición”, rescampló Adrián Pumares, de Foro, que refugó cualquier tipu d’ayuda pública a la celebración de corríes de toros. “Que los espectáculos taurinos desapaezan por que la xente dexe d’acudir, pero non por que se lo prohibamos”, espresó.

Sergio García Rodríguez, de Ciudadanos, tamién defendió la llibertá individual y apuntó que “el tiempu dirá. Si nun son rentables, dexarán de facese. Tamos contra les prohibiciones”. “Tamos falando de llibertá”, insistió, pela so parte, María Gloria García Fernández, del PP.

19 votos en contra

La última en tomar la pallabra foi la socialista Lidia Fernández Fernández, que señaló que “esti asuntu requier un marcu de debate muncho más amplíu y más sosegáu que’l propiu debate d’una PNL”. Tamién encamentó a Podemos y IX a llevar “esta reforma llexislativa que proponen” al Congresu, “onde tienen representación”, por considerar que la Cámara Baxa ye’l llugar onde deber tratase esta cuestión, y anunció l’astención del so grupu qu’impidió que la PNL saliera alantre al rexistrar 6 votos a favor, 20 astenciones y 19 en contra.

Na semeya, Vallina y Palacios xunto con Iglesias y representantes d'Huellas del Sella que siguieron en direuto la segunda sesión del Plenu.