La FSA analiza'l xueves l’escenariu nuevu de la negociación de la reforma estatutaria

|
Gimena Llamedo y Dolores Carcedo tercer aconceyamientu xineru reforma del Estatutu

El Comité Executivu de la FSA va analizar mañana l’escenariu nuevu de la negociación de la reforma estatutaria llueu de la propuesta fiscal de Podemos y el preste de Foro pa retomar les negociaciones. Los socialistes vienen insistiendo nun pautu a cuatro pa modificar la norma autonómica, mentes qu’Izquierda Xunida (IX) apuesta pola oficialidá al tiempu que se desmarca de la rebaxa d’impuestos.

La reforma del Estatutu y la reforma fiscal foron el tema estrella nes intervenciones de los portavoces de los grupos parllamentarios a la salida de la Xunta de Voceros d’esta mañana. La socialista Dolores Carcedo aseguró que “tamos dispuestos a estudiar y analizar les propuestes que se pongan enriba de la mesa y que permitan n’avanzar nun alcuerdu”, dalgo que’l Comité Executivu va facer mañana col documentu apurríu por Podemos, apuntando darréu que “lo que tamos buscando ye un alcuerdu ente les cuatro fuercies que tamos sentaos pa falar de la reforma del Estatutu”.

L’aprobación d’una modificación de la norma autonómica qu’incluya la oficialidá venceyóla Adrián Barbón dende un primer momentu tamién a un alcuerdu entes les trés fuercies d’izquierda sobres les esixencies fiscales marcaes n’ochobre por Foro –partíu al que Carcedo señaló esta mañana como responsable del bloquéu–, dalgo no que vien insistiendo estos díes el presidente. Esta mañana en Santander fíxolo otra vegada.

Mentanto, IX, única fuercia que nun fixo declaraciones llueu de la Xunta de Voceros, desmárcase de la propuesta de Podemos, aceptada por Foro como puntu d’entamu pa la negociación, al tocar rayes coloraes pa la coalición, y demanda centrase dafechu na reforma del Estatutu. Entiende que les otres trés fuercies sumen 25 votos, suficientes pa sacar alantre modificaciones fiscales na Xunta Xeneral, y que les dos cuestiones han separtase p’avanzar hacia la oficialidá.

Sicasí, dende esta formación califiquen de peligrosa la vía abierta, faciendo referencia al interés amosáu esta mañana por PP, Ciudadanos y VOX d’incorporase al alderique sobre la fiscalidá, y llamenten la perda de los tiempos, ensin calendariu una vegada pasáu’l mes de xineru. Ven mui difícil que, d’aprobase la reforma, pueda llegar a tiempu a les Cortes nesta llexislatura.

Reclamación de lideralgu a los socialistes por parte de Podemos

Esti escenariu ye’l que van estudiar mañana los socialistes, a los que Podemos reclamen lideralgu. “Tamos tardando en que se convoque la mesa pa siguir falando de los conteníos de la reforma estatutaria, porque lo qu’hai ye una propuesta concreta del artículu 4”, apuntó Rafael Palacios, que demandó “falar de conteníos concretos, que los hai y nun ye sólo la oficialidá. La reforma del Estatutu contempla munches otres posibilidaes de les que queremos falar dende Podemos Asturies y tamos perdiendo el tiempu n’enrocase”.

“Lo importante ye, si hai una situación de bloquéu, resolvela. Nun hai más, ési ye’l compromisu qu’hemos tener los cuatro grupos parllamentarios si de verdá defendemos y queremos una reforma del Estatutu, depués de 40 años, y la oficialidá de les llingües d’Asturies”, siguió’l voceru de la formación morada. Sobre la propuesta fiscal del so partíu apuntó que "aumenta la progresividá y beneficia a les clases populares, y nun pon en peligru la Sanidá nin la Educación, a les que defendemos firmemente".

Na semeya, Gimena Llamedo y Carcedo, representantes de la FSA nes negociaciones de reforma del Estatu, nel últimu aconceyamientu, terceru de xineru, celebráu'l día 24.

Contador Estadistiques