La folixa del fútbol asturianu

El resultáu al acabar de cinco goles a tres al favor d'Asturies diz muncho de lo que foi esti tercer partíu de la dómina "moderna" del equipu nacional. L'alcuentru énte Honduras foi una folixa de xuegu, goles y espectáculu, resultando'l meyor partíu, no cincante a fútbol, de los que se lleven xugaos estos años. Namás entamar el partíu, Asturies encarriló la tarde bien ceo. Abelardo, col so clásicu remate al sacar un corner, y Mario, conxuntándose con Villa en saque de falta, marcaron los dos primeros goles p'Asturies. El terceru p'Asturies vieno tamién a balón paráu, con Oli aprovechando un corner, pero enantes d'acabar la primer parte Saul Martínez marcó'l primeru pa Honduras nuna xugada guapa iguada ente dellos futbolistes estranxeros. Nun-yos duró muncho l'alegría, porque Villa metió'l cuartu de tiru cruciáu dende bastante lloñe, ensin que Milton Flores pudiere atayar el balón.

Pa la segunda parte el seleccionador Novoa viose obligáu a cambiar más futbolistes de los que pensaba por culpa de les lesiones d'Abelardo y Manel, polos qu'entraron Miguel y Pablo Díaz. L'equipu tuvo de recomponese sobre la marcha, pero entós entró en la fase más entretenida, con dambos conxuntos viendo puerta y con contragolpes prestosos. El marcador pudo movese muncho, pero los porteros atayaron tolo que-yos llegó, col asturianu del Valladolid Julio Iglesias mui concentráu, anque lo mesmo podría decise del hondureñu Víctor Coello, qu'amargo a un Villa mui trabayador. Con too y con ello, la cosa nun podía quedar como taba, y Miguel y Saul Martínez pesllaron el marcador yá nel últimu cuartu d'hora.