La filoloxía asturiana vuelve al debate

La reforma de les titulaciones universitaries, que tienen que concueyar coles esixencies del Espaciu Européu d'Educación Superior, obliga a remocicar ente otres les titulaciones de filoloxía que s'imparten n'España. Ana Cano, decana de la facultá de Filoloxía d'Uviéu, esplicó a Asturies.com les claves d'un procesu que pue llevar a la creación de la titulación de Filoloxía Asturiana.


Ana Cano forma parte del grupu de decanos de facultaes de filoloxía que faen un grupu de trabayu propiu dientro de les comisiones qu'ellaboren el llibru blancu de la reforma universitaria y que tan ellaborando les propuestes de nueves titulaciones en filoloxía que tien d'entregase a l'ANECA (Axencia Nacional d'Evaluación de la Calidá y Acreditación) organismu que tendrá d'analizar les propuestes del grupu de decanos.


Según comentó la decana de filoloxía d'Uviéu y presidenta de l'Academia de la llingua Asturiana a Asturies.com, entovía nun esiste entovía una propuesta formal de reforma de les titulaciones, pero l'equipu de decanos ta trabayando con priesa sobre'l borrador en cuantes que l'ANECA dio'l mandáu de que tien de tener una propuesta zarrada pa mayu como mui tarde. En cualquier casu, y a propuesta d'Ana Cano, la filoloxía asturiana entró nel debate y nel borrador provisional, consiguiendo l'asentimientu de tolos 16 decanos del grupu. Anque nun hai una propuesta concreta de titulaciones, la decana asturiana ye del convencimientu de que "la filoloxía asturiana va tener un tratamientu nesti nuevu marcu equivalente al de toles demás filoloxíes".

Cano sorraya que nun ye la primer vegada qu'organismos universitarios-y dan un sofitu a la titulación en filoloxía asturiana, faciendo mención al posicionamientu al favor de la mesma que yá diere la Conferencia Nacional de Decanos, pero pide un mayor compromisu dende Asturies. La decana nun dexa pasar la ocasión de remembrar que "ye preciso que les autoridaes asturianes demuestren que tan pola creación d'esta titulación. Yá esiste un posicionamientu al favor de la Xunta Xeneral del Principáu y esi plan de normalización qu'acaben de sacar tien un puntu específicu que compromete al gobiernu asturianu na defensa de la filoloxía asturiana, asina qu'espero que lo cumplan".

De cualquier manera de les pallabres d'Ana Cano entesácase un llamáu a la prudencia. La decana llama l'atención sobre'l fechu de qu'anque tea falándose yá nos medios de propuestes concretes de titulaciones, na última xunta de decanos, que se celebró esta mesma selmana en Madrid entovía nun se sabía'l númberu de titulaciones que van dir na propuesta, esistiendo incluso la posibilidá de que se vaya a una titulación única. D'esta reunión namás que salieron en claro unos pocos puntos en común colos que tan d'alcuerdu tolos decanos. Ún d'estos puntos sedría'l de dir a una "troncalidá mínima" nes nueves titulaciones, ello ye, qu'haya'l mínimu d'asignatures obligatories en cada carrera; otru d'estos puntos ye'l que se pueda facer la máxima combinatoria posible de llingües nos itinerarios educativos, mientres qu'un tercer puntu fala de la posibilidá de combinar nos estudios les materies propies de la filoloxía con otros módulos non necesariamente llingüísticos. La decana de filoloxía apunta qu'esisten munches duldes nel procesu y fala de la "desinformación" cola que trabayen los decanos pa facer les sos propuestes, llamentando que la intención del gobiernu "paez que pasa más por una reducción del númberu de titulaciones, cuando yo quiero más falar d'una reestructuración, que ye de lo que se trata en realidá".